Luka 2

Yesu kogaligwa Mng’anda ya Mulungu

22 Vikivikile kipindi cha kuisunha kamba Musa viyalagize mna Gamalagizo gake, Yusufu na Malia wamsola imwana na wachola nayo Yelusalemu muladi wamwike mgameso ga Mndewa, 23 kamba viyandikigwe mna Gamalagizo ga Mndewa, "Kila mwana wa chaudele wa kimbigalo yonda yavumbuke yagaligwe mgameso ga Mndewa." 24 Vivija wachola kulava nhosa kamba malagizo ga Mndewa vigalondile, "Huwa wabili hebu makinda mabili ga njiwa."

25 Kipindi acho kukala na munhu yokala Yelusalemu, twaga jake Simeoni. Munhu ayo kakala yotenda goyolonda Mulungu na komdumba Mulungu. Vivija kakala yobetela ukombozi wa Izilaeli, na Loho Yang’alile kakala hamoja nayo. 26 Nayo Loho Yang’alile kamulongela honda yafe mbaka yamone Kilisito Mkombola. 27 Loho kamulongoza Simeoni yachole kuna Ing’anda ya Mulungu. Abaho Yusufu na Malia wamgala imwana Yesu kuna Ing’anda ya Mulungu wamtendele kamba Malagizo ga Musa vigalondile. 28 Simeoni kamsola imwana mmakono gake, kamtogola Mulungu, kalonga,

29 "Mndewa, sambi kusang’hana kamba viulongile,

muleke msang’hanaji wako yachole moyo uholile.

30 Kwa meso gangu niuwona ukombozi wako,

31 ukombozi uutandile mgameso ga wanhu wose.

32 Mulenge uwatenda wanhu haweli Wayahudi wajuwe goulonda,

na kugala ukulu kwa wanhu zako wa Izilaeli."

33 Tatake na mamake imwana wakanganya kija kiyalongile Simeoni mbuli ya imwana. 34 Simeoni kawatambikila, kamulongela Malia, "Mwana ino kasaguligwa na Mulungu mbuli ya kupotela na kukomboligwa wanhu wengi wa Izilaeli. Nayo kokuwa kilaguso kulawa kwa Mulungu, na wanhu wengi womulema. 35 Abaho magesa ga wanhu wengi gogubuligwa. Na gweye mwenyego, usungu uli kamba panga dikutwa dousoma moyo wako."

36 Kukala na mgane imoja mtula ndagu wa Mulungu, yakalile mvele ng’hani, twaga jake Ana, biti Fanueli wa lukolo lwa Asheli. Mtwanzi ayo kakala na mkasano wake kwa miyaka saba toka yasoligwe. 37 Nayo kakala mgane mbaka viyavikize miyaka malongo manane na nne. Kipindi chose acho kakala Mng’anda ya Mulungu imisi na ikilo, komgwaa ukulu Mulungu, kopula na kofunga kuja. 38 Saa iija kavika, kamgwaa nhogolwa Mulungu na kalonga mbuli za imwana kwa wanhu wose wakalile wombeta Mulungu yaikombole Yelusalemu.