2 Vizibitile siku sita, Yesu kamsola Petulo, Yakobo na Yohana, kachola nao waiyeka kuna ulugongo lutali. Viwakalile wolola, Yesu kagaluka. 3 Viwalo vake vikala vizelu chuwee, na kuduhu munhu yoyose mwiisi yodaha kuvifuwa viwe vizelu kamba vivo. 4 Baho wanahina waja wadatu wamona Eliya na Musa wolonga na Yesu. 5 Petulo kamulongela Yesu, "Mfundiza, vinoga tweye tukale hano! Tozenga viheha vidatu, kimoja chako gweye, kimoja cha Musa na kimoja cha Eliya." 6 Petulo hajuwile cha kulonga kwavija heyo na wayage wakala wodumba.
7 Abaho dilawilila wingu na kuwagubika na sauti ilawa mdiwingu, ilonga, "Ino ayo Mwanangu inimnogele. Mumtegeleze!" 8 Bahaja wawegesela kuno na kuno, lakini hawamonile munhu yoyose iyagwe, ila Yesu yaiyeka hamoja nao.
9 Viwakalile wohumuluka kulugongo Yesu kawazuma, "Sekemumulongele munhu yoyose mbuli zino zimone, mbaka Mwana wa Munhu vonda yazilibuke kulawa kwa wafile."
10 Watogola kija kiwalongeligwe, lakini wasonga kuiuza, "Kuzilibuka kwa wafile, fambulo jake choni?" 11 Wanahina zake wamuuza Yesu, "Habali wafundiza Malagizo ga Musa wolonga Eliya kolondeka yeze tanhu?"
12 Yesu kawedika, "Ona, Eliya kokwiza tanhu, muladi yakitande goya kila kinhu. Lakini habali Maandiko Gang’alile golonga, Mwana wa Munhu kodununzika ng’hani na kulemigwa? 13 Nowalongeleni, Eliya kamala kwiza na wanhu wamtendela viwalondile, kamba vija Maandiko Gang’alile vigalonga."
Yesu komuhonya mbwanga yeli na kinyamkela
Mat 17:14-21; Luk 9:37-43