Yohana 9

Yesu komuhonya munhu yavumbuke msuwameso

1 Yesu viyakalile kogenda, kamona munhu yavumbuke msuwameso. 2 Wanahina zake wamuuza, "Mfundiza, nzambi gani imtendile munhu ino yavumbuke msuwameso? Vino heyo ayo yaitendile nzambi ayo hebu tatake na mamake?"

3 Yesu kawedika, "Ino hailawilile kwavija heyo katenda nzambi hebu tatake na mamake watenda nzambi. Lakini kavumbuka msuwameso ili udahi wa Imulungu oneke kumwake. 4 Kwavija ing’hali imisi, tolondigwa tusang’hane sang’hano ya ija yanhumile. Ikilo yovika, baho kuduhu munhu yodaha kusang’hana. 5 Kipindi ning’hali mwiisi, niye na mulenge wa isi yose."

6 Viyamambukize kulonga vino, Yesu katema mate hasi, kabuluga nhope kwa mate gaja, abaho kambaka mgameso munhu ija msuwameso. 7 Yesu kamulongela, "Genda kasunhe kihanga chako hana dilamba da Siloamu." Siloamu fambulo jake "Yatumigwe." Avo munhu ija kachola, kasunha kihanga chake, kabwela yolola.

8 Wanhu weli mmabehi nayo, na wanhu wamonile aho umwaka yopula, ing’hali hainalawilila mbuli ino, wauza, "Vino ino siyo munhu ija yakalile na kupula?"

9 Wanhu wayagwe walonga, "Iyo heyo," lakini wayagwe walonga, "Aka, siyo heyo, kaigala nayo."

Avo munhu ija kalonga mwenyego, "Iyo niye."

10 Wamuuza, "Vino kudahaze kulola?"

11 Kawedika, "Munhu yokemigwa Yesu katenda nhope, kanibaka mgameso gangu, kanilongela nigenda Siloamu nikasunhe kihanga changu. Avo nichola, na bahaja vinisunhile nidaha kulola."

12 Wamuuza, "Munhu ayo kakwahi?"

Kawedika, "Mmhane."