Mateus 21

Yesu kokwingila Yelusalemu kwa ng’henze

1 Yesu na wanahina zake viwavikile Yelusalemu, wachola Betifage kuna Ulugongo lwa Mizeituni. Baho kawatuma wanahina zake wabili wamulongolele, 2 kawalongela, "Gendeni kuna ikijiji kili kuulongozi wenu, aho momvika kihongwe kafungigwa na mwanage kumgwazo. Wafunguleni mungalile hano. 3 Munhu yoyose yahawauza, mulongeleni, Mndewa kowalonda, nayo kowaleka wachole."

4 Gano gatendeka ili kiyalongile mtula ndagu wa Imulungu kilawilile,

5 "Dilongele buga da Sayuni,

Lola, mndewa wako kokwiza!

Muhole na kakwela kihongwe na

mwanage kihongwe."

6 Avo wanahina wachola watenda vivija viyawalongele Yesu watende. 7 Wamgala ija ikihongwe na mwanage, watandika viwalo vao mmigongo mwa waja ivihongwe, na Yesu kakwela uchanha. 8 Lunhu lwa wanhu lwanzanza viwalo vao mnzila kuno wayagwe wabena mibunho na kuyanzanza mnzila ili yabite. 9 Wanhu wakalile kuchugu na kuulongozi wa Yesu wakemelela,

"Yatogoligwe mwana wa Daudi!

Imulungu yamtambikile ija yokwiza kwa twaga da Mndewa!

Imulungu yatogoligwe!"

10 Yesu viyengile Yelusalemu, wanhu wose wa kudibuga wading’huka na waiuza, "Ino ayo nani?"

11 Lunhu lwa wanhu lwidika, "Ino ayo Yesu, mtula ndagu wa Imulungu kolawa Nazaleti mwiisi ya Galilaya."