Matayo 25

Nhaguso ya kimambukizo

31 "Mwana wa Munhu yeli Mndewa vonda yeze muukulu wake, hamoja na wasenga zake wa kuulanga, kokala mkigoda chake cha undewa. 32 Wanhu wose mwiisi oiting’hana haulongozi wake, nayo kowabagula kamba msusilaji viyowabagula ng’hondolo na mbuzi. 33 Nayo koweka wanhu watendile goyolonda Imulungu mwambu wa mkono wake wa kudila na wanhu watendile gehile mwambu wa kumoso. 34 Abaho Mndewa kowalongela waja wakalile mwambu wa mkono wake wa kudila, ‘Izoni mweye munogeligwe na Tatangu! Bokeleni uhazi wenu, undewa umutandiligwe tangu kulumbigwa kwa isi. 35 Ng’hala na nzala mweye mungwaa ndiya, ng’hala na ng’hilu mweye mungwaa mazi, ng’hala mgeni mweye mumbokela mzing’anda zenu. 36 Ng’hala mwazi mweye mumvaza, ng’hala mtamu mweye mwiza kundola, ng’hala ngodekigwe mkifungo mweye mwiza kundola.’

37 "Wanhu watendile goyolonda Imulungu omwidika, ‘Mndewa, kipindi gani tukona kuna nzala na tukugwaa ndiya, hebu kuna ng’hilu na tukugwaa mazi? 38 Kipindi gani viukalile mgeni na tukubokela mzing’anda zetu, hebu viukalile mwazi na siye tukuvaza? 39 Kipindi gani tukona mtamu hebu kugodekigwa mkifungo, twiza kukulola?’ 40 Mndewa kokwidika, ‘Nowalongela fulu ipile, chochose kimumtendele imoja wa ndugu zangu awo weli wadodo, munhendela niye!’

41 "Abaho kowalongela waja weli mwambu wa kumoso, ‘Segeleni kumwangu, mweye muduwiligwe! Muchole kuna umoto haufaga, uyekiligwe Mwenembago na wasenga zake! 42 Ng’hala na nzala mweye hamungwelele ndiya, ng’hala na ng’hilu mweye hamungwelele mazi, 43 ng’hala mgeni mweye hamumbokele bule mzing’anda zenu, ng’hala mwazi mweye hamnivazile bule, ng’hala mtamu na mkifungo mweye hamwizile kundola.’

44 "Abaho omwidika, ‘Mndewa, kipindi gani tukona kuna nzala hebu ng’hilu hebu kwa mgeni hebu kwa mwazi hebu kwa mtamu hebu mkifungo na siye hatukutazile bule?’ 45 Mndewa kokwidika, ‘Nowalongela fulu ipile, chochose hamumtendele imoja wa wanhu awo iwadodo, hamunhendele niye.’ 46 Wano ogaligwa mmagazo ga milele, lakini waja watendile goyolonda Imulungu ogenda muugima wa milele."