Walumi 13

Kuwategeleza watawala wa isi

1 Kila munhu yawategeleze watawala wa isi, kwavija utawala wose olawa kwa Imulungu. Utawala wose uli mziisi wikigwa baho na Imulungu. 2 Avo, munhu youlema utawala wa mwiisi kolema kija kiyekile Imulungu, na munhu yoyose yotenda vivo koigalila mwenyego nhaguso yake. 3 Kwavija watawala wa mziisi hawadumbigwa na wanhu otenda ganogile, lakini odumbigwa na wanhu otenda gehile. Avo gweye wahalonda sikuuwadumbe watawala wa mziisi sang’hana ganogile, na wao okutogola. 4 Kwavija wao ni wasang’hanaji wa Imulungu, okusang’hanila ganogile. Lakini wahasang’hana gehile baho wadumbe, kwavija wao wana udahi wa kutagusa. Wao ni wasang’hanaji wa Imulungu na olagusa ng’hasiliki ya Imulungu kwa wanhu otenda gehile. 5 Kwa mbuli ayo wategelezeni watawala wa mwiisi, siyo mbuli ya ng’hasiliki ya Imulungu iiyeka, lakini kwavija vivo viulonda moyo usang’hane.

6 Lekaavo mweye moliha kodi, kwavija watawala wa mwiisi ni wasang’hanaji wa Imulungu, nao owasang’hanila mweye. 7 Mulihe kila munhu fungu jake, liha kodi kwa munhu yobokela kodi, liha ushulu kwa munhu yobokela ushulu, munhu wa kumdumba mdumbe, munhu wa kumtegeleza mtegeleze.