Mateus 21

Yesu kokwingila Yelusalemu kwa deng’ho

1 Yesu na wanahina wake viwakalile habehi na Yelusalemu, wafika Besifage kuna ulugongo lwa Mizaituni. Uko Yesu kawatuma wanahina wake waidi wamulongolele. 2 Kawalongela, "Hiteni mbaka chibululu chiya chili kuulongozi wenu. Baho mwizamfika chihongwe na mwanage wafungigwa, wafunguleni muwagale hano. 3 Munhu yahamulongelani mbuli yoyose, longeni, ‘Mndewa kowalonda na kezawabweleza.’ "

4 Yano yose yalawila muladi yaja yose yalongigwe na mulotezi wa Mulungu yatimie, 5 "Dilongele bululu da Sayuni,

‘Lola mfalume wako kokwiza,

muhole na kakwela chihongwe,

mwana chihongwe.’ "

6 Wanahina waja wahita, watenda fana Yesu viyawalagilize kutenda. 7 Wamgalila Yesu chihongwe ija na mwana chihongwe, wanzanza viwalo mchanyha yake na Yesu kakwela kungongo wake. 8 Wanhu wengi wanzanza viwalo vawo mwiinzila na wanhu wamwenga wakanha matambi ya ming’andi ya mitende, wayazanza mwiinzila. 9 Lung’husesa lukulu lwa wanhu lulongole na waja wowasondelele walandula madizi yawo, walonga,

"Nhogolwa, Mwana wa Daudi,

Mulungu yomtemela mate yokwiza kwa zina da Mndewa!

Nhogolwa kwa yeli mchanyha ng’hani kuulanga."

10 Yesu viyengile Yelusalemu, bululu jose dingila tivitivi da wanhu. Wanhu wauza, "Ino iyo yelihi?"

11 Lung’husesa lwa wanhu lwidika, "Ino ni Yesu, Mulotezi wa Mulungu kulawa Nazaleti yili uko Galilaya."