1 U shɔbiiyi ɔ awɔ yuu ɔ zɛtɛttɔ nɛ u anɛ ɔ ɗɔbii siɓa nɛu niitɔ ɓa. 2 U ɓɛɛ anɛ awɔ ɗɔbii a Tasaloniya ɔ zɛ nɔgbete shɔ tasiu raa tɛttɔ a dãnɛ ni a komoo pɛ̃niba Filipi. piti nɔgbete u shɔnɔpɔ̃yi i si ɗɔn fɛ̃ɛm ni , u Ɗalapa masiubii nɛu gelɔɔ ruu tɔ̃vɨn gbete shɛ au ɗɔbiiyɛtɔ. 3 Ɗanyaruubi au nwarɔɔ si ɓanɛ u niitɔ ɓa ko a sisɨn gbɔrki ɓa, ɓanɛ u kasi nɛu ɗaki shɔwɔ ɓa. 4 Anɔgbete u si pɛlinam, kopiɗaviya u sha ɓɛɛ jo vigbete Ɗalapa kasi nɛu shayɛ, aruviya yeeruu tɛttɔ au yuuni nɛu yɛ nɔgbete shɔ ãu ruu tɔ̃vɨn nwanɛ a naayɛtɛ. Ɓanɛ u kasinɛ shɔu nta binyatɔ̃nɛ ɓa, ama u kasirɛ Ɗalapa u ntabiinyatɔ̃nɛrɛ, shɔgbeteu ntau visisɨntɔ kopiɗaviya. 5 Ɔ zɛtɛttɔ fɛ̃ɛm nɛ u ji awɔ ɗɔbii ɓa a nya shɔ̃tinɛ ɓa, sɔ̃n ɓanɛ u pɛli vishonɛ au ruu nwanɛ u kukiu gbɔgbɔrɛ ɓa, Ɗalapa ukɔ ɔ̃rɛ u shɔshikɨntinɛ! 6 ɓanɛ u kã bɛlinɛ a kopiya ɗɔbii ɓa, ko awɔ ɗɔbii ko a shɔwɔyi ɗɔbii, 7 Nɔgbete u Kirisi jashonɛ u si kã viwɔtɛ awɔ naani ama aɗagbete u si a ɔkɔɔniyɛ u si shɔ yuuroorinɛ, naa jaa ɓini kɔu jaayiyɛ, 8 Aru u ɔrinɛ gbete u ɔrɔɔyɛ, u mabii tɛttɔ ɓanɛ u nwarɔɔ ruu tɔ̃vɨn au shɛ Ɗalapa ɗɔbiikɔ sheeli ɓa ama ko u suru u ãtɔ awɔ yuuni. Aruviya ɔ tou sisɨn tɛttɔ fɛ̃ɛm! 9 Pɛ nizɛ, ɔ kpaa sisɨn tɛttɔ n shɔbiiyi, nɔgbete u shovishonɛ au ɓooraaniǃ U pɛli vishonɛ a ɔkɔɔni zɨmba a niti ni nɔgbete u yɛ ɔ̃rɔɔ yukɔnɛ wɔ ɓa aɗagbete ukɛ nwarɔɔ ruu tɔ̃vɨn nɛ au shɛ a Ɗalapa ɗɔbiiyɛ. 10 Ɔkɔɔ ɔ̃rɛ u shɔ shinɛkɨntiyi, Ɗalapa pɛ jo nankɔ, u ruubii gbete u tasɔɔ shɔ sisɨn ãnɛyi si pɛ tɛpɛ-tɛpɛ, tɔ̃vɨn, ruuvini ɓa ɗɔnniɓa. 11 Ɔ zɛtɛttɔ u kɔ wɔ naa jaa ɓeye a ɓini i kɔyi ɓɛɛ jaayiyɛ. 12 U masɔɔbiitɔ, u sɔ̃nrɔɔmurutɔ u yɛ ɗekɨn awɔ gakinɛni ɔ ɔ̃ zɔ̃n ɔ̃nɛ gbete Ɗalapa ntabiinyatɔ̃nɛ a ɔkɔɔni, shɔgbete ɓawɔ nyanɛ ɔ kpaa ɔ̃nɛ awuni au ɗɔ kpati roonɛ a bassinɛni.

13 Aruumkɔ u dɔ̃ri Ɗalapa tɔ kopiɗaviya. Naa ɔkɛ weshonɛ Ɗanyaruubiinɛ gbete u n-tɔyɛni, ɔ tɛrɛ ɓa naa shɔzɛ ruu-nwanɛ ɓa ama ɔ tɛrɛ nɛ pɛ Ɗalapa nyanwanɛ, pɛ jo nankɔ. Ɔ shɔgbete ɔ ãsisinyɛ Ɗalapa u ɗɔgbeteu shovishonɛ awɔ sisɨnni. 14 U shɔbiiyi, vigbete au pɛli ɓa a ɔkɔɔnim, pɛli sɔ̃njo namkɔ a shɔ sisɨn ãnɛ gbeteyi a tipi Yahudiyani, a shɔ gbeteyi pɛ Kirisi Yesɔ ɓɛɛyɛ. Ɔ ɓoo ji raa gbetenkɔ piti a mɛshɔzɛyi naa, ayi ɓoo a Yahudawayi naa, 15 yahudawayi gbeteyi nyo Uɓeyelapa Yesɔ a janyagadiyini, ai tasiu raayɛ. Ɗalapa ji ntatɔ̃vɨng ɓa a ikɔyini ɓa, aruviya i ɔ̃ nɔpɔ̃ a kopiyani. 16 I kã nɛi zãriu shɔgbeteyi ɓa Yahudawa ɓa ruu tɔ̃vɨn nwarinɛtɔ au yɛ n-tiyi raanɛyɛ. Ji nyabankɔ i yɛ ɗekɨn a ruuvini pɛlinɛni yɛnɛ lee gbete Ɗalapa yɛ tasiyi raayɛ. Dɔdɔrim Ɗalapa sisɨn lɛsinɛ nɔtɛ ai yuuǃ

17 Au bi n shɔbiiyi, naa shɔkɛ vɔsiunɛ a ɔkɔɔni sekaa, vɔsinɛ a bi ɓa sisɨn ɓa, nɔgbete ɔ yaauyɛ a nɔgbete u nwayuu fɛ̃ɛm n-tɛ u kasɔɔ zɛnɛ sɔ̃nyɛ! 18 U kasirɛ u sɔwɔ ɗɔbiitɔ. N ang yuu n kasirɛ n sɔwɔ ɗɔbii ɓako-ɓako, ama japɛ̃pɛ̃ɛ̃ ji yau ɓa. 19 Akɨntini kpai ɔkɔɔ pɔ̃u sisɨn pɔ̃nɛrɛ, ɓa shɔwɔyi ɓa, ɔkɔɔ pɔ̃u sisɨn puru ntanɛrɛ, ɔkɔɔ ɔ̃rɛ vigbete au sɨu baasinɛ ayuu vigbete Ɗashaariuyɛ a Uɓeyelapa Yesɔ ɗekɨn naa kaanɛyɛ. 20 Pɛ nizɛ kɔ, ɔkɔɔ ɔ̃rɛ vigbeteu sɨu baasinɛ a sisɨn puru ntanɛni!