1 U nyayisinɛ, u zɛrɛ u yɛ masisɨn dɔɔtɔɓa u shirɛ ɓa. Aruukɔ u lɔrɛ n-tɛ u ɔ̃ a Atina au nɔɔ. 2 U sho Timotirɛ, u ɓɛzɔ̃ shɔgbete au shoshi Ɗalapa vishonɛ a ukɔɔni a nyaba ruu tɔ̃vɨn nwanɛ a Kirisi yuu. U shourɛ u lakɔbii, u pɔ̃sɔɔnaa a nyaba sisɨn ãnɛ, 3 aru nɔgbete shɔwɔ yɛ sɔɔ knti ɓa aru raatasinɛm ɓa. Ɔ zɛtɛttɔ awɔ yuuni nɛ, u yɛ ɓooraa nankɔ aruviya pɛ Ɗalapa kasirɛ nɛu ɔ̃ nankɔ. 4 Aruviya aɗagbete u si awɔ ɗɔbiiyɛ, u gelɔɔ si tɛtɔ n-tɛ ɔ yɛ ɓooraatɔ; nagbete ɔ zɛtɛtɔ fɛ̃ɛmkɔ, ji vigbete au shau ji ukɔ pɛlirɛ. 5 Aruukɔ n zɛ naa n shi dɔɔtɔɓa, n sho Timoti kn. N shourɛ u hɨrɔpɛ awɔ ruu sisɨn ãnɛni. Seti pɛlintɔ n-tɛ wɔɓa shɔ-shɔ ɗakinɛ ɗakawɔmtɛ aruviya u vishonɛ yɛ ɔ̃rɛ wati weze!

6 Dɔdɔrim Timoti sɔɔ atɛ, n-tiu ruu tɔ̃vɨntɛ aru ɔ sisɨn ãnɛ a zɔ ɔrinɛ ni. Geliutɛ nɛ ɔ lɛritɔ tɔ̃vɨn au yuuni kopiɗaviya, ɔ kasiu zɛnɛtɔ fɛ̃ɛm nagbete u kasɔɔ zɛnɛ sɔ̃njiyɛ. 7 Aru nankɔ, n shɔbiiyi, au yuyɔrinɛ a raaɓoonɛni piti kpai shɔ masiubii tɛttɔ awɔ yuuni. Si jo ɔ sisɨn ãnɛkɔ masiu birɛ, 8 aruviya dɔdɔrim u yɛ ɔ̃ dɔɔtɔ ɔkɛ shinɛdɔkaziti aka yuɓasinɛ a Uɓeyelapani. 9 Dɔdɔrim u dɔ̃ri Ɗalapa dɔɔɓa awɔ yuuni ɓa. U dɔ̃uritɛ fɛ̃ɛm a sisɨn puru gbete ɔ n-tiu ɓa a ɗekɨn mini. 10 Zɨmba a niti ni u ɗɔgbete u gaki Ɗa awɔ yuu u zɛwɔ sɔ̃ntɔ, u ãwɔ vigbete ɔ ɓa awuni ɓa awɔ tete sisɨn ãnɛ.

11 Mɛnɛ u Ɗalapa u ɓeye au yuu, a Uɓeyelapa Yesɔ u pɛliu nyaba ɔ ɗɔbii anɛtɔ! 12 Mɛnɛ Uɓeyelapa u pɛlɔɔ nyaba zɔ ɔrinɛ a shɔni piti kpaitɔ, u barɛ u yɛ ɗekɨnɗekɨn u ɔ̃kɛ pɛ̃niba nagbete u ɔrɔɔyɛ. 13 Jo a nyabankɔ yɛ lakɔɔbiirɛ, ɔ yɛ ɔ̃kɛ tɛpɛ-tɛpɛ a wɔsɔ-wɔsɔ au Ɗalapa ɗekɨn a ɓeyeni, aɗagbete Uɓeyelapa Yesɔ kaanɛ a shɔgbeteyi pɛ u ɓɛɛyini.