Ruu Ɗa Suru Au Tasi Shɔ Ɗa Vɔɔ Susãri abi a Kirisi kabii
3 U dɔ̃ri Ɗalapa tɔ ukɔ ɔ̃rɛ Uɓeyelapa Yesɔ Kirisi u ɓeye! Aru u yuɓasinɛ a Kirisini tasiu Ɗa vɔɔ susãritɛ bi a nyaba au ãu ko-pi ruu Ɗa Suru shɔpiya au tasiu shɔ Ɗa vɔɔ susãri bi a koo gbete a kolapayɛ. 4 Koo u ɓɛɛ shɛnɛ, si Ɗalapa lɔu tɛttɔ gboti u ɔ̃ u ɓɛɛ, au yuɓasinɛ a Kirisini, aru u ɔ̃ shɔ Wɔsɔ-wɔsɔ au ɗekɨn, shɔgbete ai ruuvini ɓa ɗɔnɓa.
Aru u ɔrinɛ 5 Ɗalapa matɛttɔ au sisɨn nɛ a ka Yesɔ Kirisikɔ nɛn yɛ pɔ̃rɛ u ɔ̃ ɓɛɛ jaayi, 6 U bɛli Ɗalapa nɛ aru u tɔ̃vɨn bassinɛ, aru vi ãnɛ gbete ãuyɛ au ka jaa ɔrinɛyɛ. 7 Aru Kirisi kpaa gbete tɛ̃ɛ̃yɛ u kpaa naraanɛtɛ weze, Ɗalapa yaasiu ruuvinitɛ. a nyabakɔ Ɗalapa tasiunɛ u tɔ̃vɨn shonɛ pɛ pɛ̃niba, 8 gbete au ãu bang dɔrɔrɔ yɛ!
Au sẽrẽ a vigbete zɛyɛni piti kpai 9 Ɗalapa pɔ̃rɛ nɛu zɛn ruugbete ma au sisɨnyɛtɔ, si pɔ̃ tɛttɔ nɛn yisi a ɓɛɛ jaa Kirisi kabii. 10 Ɗalapa ruugbete mayɛ tɔnɛn yɛ yisiunya a ɗagbete u ɗa kaanɛ, yɛ toli vigbete shɛhi a kolapa a kotipi ni kpai ɗɔgbete, Kirisikɔ yɛ ɔ̃rɛ i yupɛ̃ni.
11 Ko iviya shɔ pɛli jo nɔgbete Ɗalapa ma au sisɨn nɛn pɛliyɛkɔ; Ɗalapa lɔurɛ nɛu ɔ̃ n ɓɛshɔzɛ aka yuɓasinɛ a Kirisini, aru vigbete kasi pɛlinɛyɛ, ayuu vigbete ma au sisɨn aɗagbete gaa yɛ. 12 Aru nankɔ u shɔgbete u gaa sisɨn pɔ̃nɛ a Kirisi bim, u bɛli Ɗalapa basinɛtɔ!
13 Ɔkɔɔma ɔ ɔ̃ Ɗalapa ɓɛshɔbiiyitɛ naa ɔkɛ weshonɛ a ruu tɔ̃vɨn ni, ruu tɔ̃vɨn gbete au n-tiwɔ naranɛyɛ. Ɔ ã sisɨntɛ a Kirisi bi, a Ɗalapa pɔ̃ u naa vishonɛtɛ awɔ yuuni u tasinɛ ɔ pɛ nɓɛɛ a nyaba au ãwɔ Ɗa Suru gbete manɛn ãwɔyɛ. 14 Ɗa Suru ukɔ ɔ̃rɛ vigbete u yɛ kpaayɛ a Ɗalapa ma a ɓɛshɔbiiyini nyamasinɛ ɓa, vimkɔ tasiutɛ nɛ Ɗalapa yɛ ã shɔ gbete i ɔ̃ u ɓɛɛ ɔ̃nɛ yuutɔ kpai. U bɛli u bassinɛ nɛ!