1 Nkɔng Bulus Ɗalapa jawɛrɛ, Yesɔ Kirisi jashonɛ shɔu beerɔɔ sẽkoom yɛ.

Aru shɔgbete Ɗalapa lɔnyɛ nɛ n masiyibii i sisɨn ãnɛ u lakitɔ fɛ̃ɛm, n pɔ̃siyinaa i zɛ vimatinɛ tɔ̃vɨn shɔgbete yɛ pɔ̃yirɛ i ɔ̃ ɔ̃nɛ Ɗalapa bassinɛ. 2 Kɛɗɔn i yɛ ɔ̃ a sisɨn pɔ̃nɛ shɔ suru gbete yisinyaɓayɛ. Ɗalapa shɔgbete yeenyaɓayɛ, u ɓɛɛ kotipi shɛshinɛ manɛ u shɔbiiyi i yɛ ɔ̃ dangdang awuni, 3 Aɗagbete Ɗalapa lɔyɛ pɔ̃rɛ shɔu zɛ u nyaruubiitɔ, pɛ Ɗalapa shɔgbete rauyɛ ang u nyawaanɛ ruu tɔ̃vɨnrɛ nɛn nwari shɔtɔ.

4 N beeri sẽkoom mɔkɔ Titus, n jaa tɔ̃vɨn a nyaba sisɨn ãnɛ u a wuniyɛ.

Mɛnɛ Ɗalapa Uɓeyɛ a Kirisi Yesɔ u shɔraanɛ u ãa tɔ̃vɨn shonɛtɛ a ɔ̃nɛbiinyatɔ̃nɛni.

5 N yaa a Kirit aru a yisi vipɛlinɛ gbete au yaayɛ, wɔsɔ̃n a lɔ shɔpɛ̃ni sisɨn ãnɛyitɔ ko-pi komɔɔ shɔpiya. A kpaasisɨn a nya gbete n kɔsaayɛ nɛ: 6 ɔ̃tɛ kaka jazɨng a kɔrɔ shɔpɛ̃niu ɔ̃ shɔgbeteu ruukɔ̃linɛ ɓa yuuni ɓa; ɔ̃tɛ kaka jazɨng a kɔrɔ u so u ɔ̃ gbete shɛli, ɔ̃tɛ kaka jazɨng a kɔrɔ u ɓɛɛjaayi u ɔ̃ shɔ sisɨn ãnɛ, shɔ ji pɔ̃yi ɓa nyaba sɔrɔni ɓa ko nɛyi gɨn shɔ nyaɓani ɓa. 7 Aruviya yupɛ̃ni sisɨn ãnɛ shɔ ãu Ɗalapa vishonɛ tɛttɔ naa, u ɔ̃ shɔ gbeteu ruukɔ̃linɛ ɓa ɗɔmɓa a kopiyani ɓa. Ɔ̃tɛ kaka jazɨng a kɔrɔ u ɔ̃ ɓa shɔ yulakinɛ ɓa, ko shɔ sisɨn tuunɛ tẽẽti ɓa, ko shɔ vikɔ̃linɛ ɓoonɛ ko shɔ bayusinɛ ɓa ko shɔ gbɔgbɔ saa ɓa. 8 Nɔgbete si pɛlinam ɔ̃tɛ kaka jazɨng a kɔrɔ u ɔ̃ shɔgbete tɛ shɔ naatɔ au wɛrɛni, shɔu ɔri vigbete tɔ̃vɨntɔyɛ, ɔ̃tɛ kaka jazɨng a kɔrɔ u ɔ̃ shɔgbete sãu yuutɔyɛ, shɔu pɛli vitɔ̃vɨng-yɛ, u ɔ̃ shɔ wɔsɔ-wɔsɔ, wɔsɔ̃n shɔu gɔ̃u u yuu yushotɔ. 9 Yupɛ̃ni sisɨn ãnɛ ɔ̃riutɛ kaka jazɨng a kɔrɔ u ãsisɨntɔ a ruu tɔ̃vɨn ni u sã a nakaziti nɔgbete shɔ matiuyɛ, a nyabankɔyɛ zɛnɔ shɔwɔyi bimasinɛtɔ a ruu tɔ̃vɨn matinɛni, wɔsɔ̃n u tasi ɗɔgbete shɔwɔyi i ji pɛli ɓa ntɔɓayɛ. 10 Aruviya shɔ yulakinɛyi aɗɔn fɛ̃ɛm, badijo shɔ gbeteyi a kn shaa yeenɛmiyi, shɔ nyakɔ̃linɛ nwalinɛmiyi, shɔ gbeteyi ɗaki shɔ a ruugbete u gɨn-gɨn ɓayɛ nɛi ã sisɨn a ɗɔn. 11 Ɔkɔɔ yaa shɔ ɗɔmiyi nɛ i mati shɔ vimrɛ, aruviya iyɛ gɔ̃ shɔ sisɨn ãnɛmiyi yuurɛ piti kpai a vimatinɛ kɔ̃linɛmni, i pɛli viyusẽm aru i kpa saa kɔ sheeli. 12 Janyagadi shɔ Kirita ukɔ ma shanɛ, <<Kiritayi kopiɗaviya i ɓɛɛ jo shɔnyayeelinɛ, kɔ̃linɛ vivaayi, i yɔki shɔ ai shaa vi bang yɛ>> 13 Ruum pɛ nizɛ. Aruukɔ ɔ lasiyitɔ, ɔ̃rɔɔtɛ kaka jazɨn a kɔrɔ ɔ zãriyitɔ a kakani, aru i ɔ̃kɛ shɔ sisɨn ãnɛ tɔ̃vɨn, 14 nɔgbete i wesho tɔɓa a Yahudawayi ruuɓereni ɓa, a shɔzɛ nya-ãsinɛ au shɛ shɔgbeteyi bɛ̃ɛ̃ ruu tɔ̃vɨnyɛyi nya ɓa. 15 Shɔgbeteu sisɨn wasak ko-iviya ɔ̃ji wɔsɔ- wɔsɔ au ɗɔbiini; ama shɔgbete i vi pɛlinɛ ɓa ntɔ ɓa a shɔ ã sisɨn ɓa ɗɔnni ɓa, i sisɨn ai vipɛlinɛni ɓa ntɔ ɓa. Pɛ nizɛ i lɛrinɛ ai sisɨn piti kpai ai sisɨn vishonɛni jo vi suɓɔ̃ng kɔ sheeli. 16 I tasi yuu naa i zɛ Ɗalapatɛ ama i vipɛlinɛ i masinya a Ɗalapani. I vishonɛ ɓa tɔ̃ɓa, i gɨn Ɗalapa nya-ãsinɛyi ɓa, i zɛnɔ vitɔ̃vɨng pɛlinɛ ɓa.