1 Vanaviitʉ, mpɨɨma ya mʉtɨma waanɨ, na kʉloomba kwaanɨ kwa Mʉlʉʉngʉ, nɨ sa Vayahúudi valamuririwe. 2 Sa nɨ koonekya niise kɨkomi, ava vaantʉ vamányɨkaa na mɨtɨma sa Mʉlʉʉngʉ, maa kaa, sɨ vamányire vira viintʉ ˆyoosaaka tʉkʉ. 3 Voovo sɨ vamányire ʉwoloki ˆufúmaa kwa Mʉlʉʉngʉ tʉkʉ. Kei, vasáakɨraa ʉwoloki waavo veeneevyo. Jeyyo, voovo sɨ viibweeyya vave matu kʉrɨ ʉwoloki wa Mʉlʉʉngʉ tʉkʉ. 4 Sa Kirisitʉ noo kukiimikirirya kwa Miiro, sa yoyoosi ˆarɨ muruma, ave mʉwoloki mbere ya Mʉlʉʉngʉ.

5 Kʉva mʉwoloki ko tuuba Miiro, Mʉ́sa aandɨka jei, "Mʉʉntʉ yoyoosi ʉra ˆatʉ́mamaa ˆmeene yasaakwa nɨ Miiro, kiikala arɨ ko yera tuuba ɨyo Miiro."✝10:5 Laanga Valáawi 18:5. 6 Maa kaa, ʉwoloki ˆwʉʉ́jaa kwa njɨra yo ruma, Masáare ˆYarɨ Mpeho yaandɨka jei, "Lʉʉsa mutimii waako jei tʉkʉ, ‘Ani ˆarɨ kaambʉka fʉʉrʉ kurumwii?’✝10:6 Laanga Nkʉmbʉkɨra ya Miiro 9:4; 30:12." Noo kʉsea akamukiimye Kirisitʉ na kʉrɨ weerʉ? 7 "Bakʉ, ‘Ani ˆarɨ kiima fʉʉrʉ ntarii?’✝10:7 Laanga Nkʉmbʉkɨra ya Miiro 30:13." Noo kʉsea akamwaambukye Kirisitʉ fuma kwa ˆvaakwya? 8 Maa kaa, Masáare ya Mʉlʉʉngʉ nɨ joolɨ yalʉʉsa?

"Isáare raachwe nɨ heehi rɨrɨ na weewe,

nɨ mʉlomwii na mutimii waako rɨrɨ."✝10:8 Laanga Nkʉmbʉkɨra ya Miiro 30:14.

Noo kʉsea rɨra isáare ro muruma Kirisitʉ ˆtʉrɨváriyʉlaa. 9 Sa koonɨ ulúusire na mʉlomo waako, "Yéesu nɨ Mweenevyoosi," na kuruma mutimii waako, Mʉlʉʉngʉ amʉfʉfʉla fuma kwa ˆvaakwya, lamuririwa ʉrɨ. 10 Sa kwa mʉtɨma mʉʉntʉ arúmaa, jeyyo aválwaa nɨ mʉwoloki, na kwa mʉlomo alʉ́ʉsaa, na jeyyo alámuririwaa. 11 Ja ˆvyeene Masáare ˆYarɨ Mpeho yalʉʉsa, "Yoyoosi ˆarɨ mwiilaangya sɨ arɨ kwaatiwa soni tʉkʉ."✝10:11 Laanga Isáaya 28:16. 12 Sa Mʉyahúudi na mʉʉntʉ sɨ ˆarɨ Mʉyahúudi sɨ viísimire tʉkʉ. Kwatɨɨte Mweenevyoosi ʉmwɨ vii kwa vaantʉ voosi, yeeye avatálaryaa kwa usúngaati voosi ˆveene vamwaánɨrɨraa yeeye. 13 Sa Masáare ˆYarɨ Mpeho yasea, "Kɨra mʉʉntʉ ˆarɨ mwaanɨrɨra Ijʉva lamuririwa arɨ."✝10:13 Laanga Yoéeli 2:23.

14 Maa kaa, vaantʉ joolɨ varɨ mwaanɨrɨra ʉra sɨ ˆvanamuruma? Joolɨ varɨ muruma, ʉra sɨ ˆvanamʉteera? Joolɨ varɨ mʉteera, koonɨ kusiina mʉʉntʉ wo vavariyʉrɨra? 15 Joolɨ vaantʉ varɨ mʉvariyʉla, koonɨ sɨ vanatʉmwa? Ja ˆvyeene Masáare ˆYarɨ Mpeho yalʉʉsa, "Myʉʉjɨre ya vaantʉ ˆvaréetaa Masáare Maaja, yabooha maatʉkʉ vii."✝10:15 Laanga Isáaya 52:7.

16 Maa kaa, sɨ voosi vakwáatyaa Masáare Maaja tʉkʉ. Sa Isáaya alʉʉsa, "Ee Ijʉva, nɨ ani ˆaruma masáare yiiswi?"✝10:16 Laanga Isáaya 53:1. 17 Haaha, kuruma kʉʉ́jaa kwa njɨra yo teera isáare, na kʉteera kʉʉ́jaa kwa isáare ra Kirisitʉ. 18 Maa kaa, nɨ kuurya niise, eri Viisiraéeli sɨ vateera tʉkʉ wʉʉ? Hɨɨ vateera. Masáare ˆYarɨ Mpeho yasea,

"Sawúti yaavo yadoma kʉrɨ ɨsɨ joosi,

noyo masáare yaavo yafika utulo waasɨ."✝10:18 Laanga Sabúuri 19:4.

19 Kei kuurya niise, eri, Viisiraéeli sɨ vataanga tʉkʉ wʉʉ? Hɨɨ vataanga. Lwa ncholo Mʉ́sa asea,

"Vabweeyya ndɨrɨ mʉvoonere kɨvɨna vaantʉ va ɨsɨ jɨɨngɨ,

na vaantʉ ˆvasiina ʉmanyi, vabweeyya ndɨrɨ mʉkalale maatʉkʉ vii."✝10:19 Laanga Nkʉmbʉkɨra ya Miiro 32:21.

20 Kei Isáaya asea ko kiitema,

"Vaantʉ vara sɨ ˆvaansaakɨráa vaantúriirye,

nɨɨnɨ niiyónekiirye kwa vaantʉ vara sɨ ˆvaanjurikiriryáa."✝10:20 Laanga Isáaya 65:1.

21 Maa kaa, kʉrɨ Viisiraéeli asea,

"Muusi woosi nawolola mɨkono yaanɨ,

kwa vaantʉ ˆvaankɨ́ɨkanaa na sɨ ˆvaantéeraa."✝10:21 Laanga Isáaya 65:2.