18 May isa ka manugdumala sang mga Judio nga nagpamangkot kay Jesus, "Maayo nga Manunudlo, ano bala ang akon himuon para maangkon ko ang kabuhi nga wala sing katapusan?" 22 Sang pagkabati ni Jesus sang iya sabat, nagsiling siya, "Isa pa ka butang ang kulang sa imo. Ibaligya ang imo mga pagkabutang, kag ang kuwarta ipanagtag sa mga imol. Kag makaangkon ka sang manggad sa langit. Dayon magbalik ka kag magsunod sa akon." 23 Pero sang pagkabati niya sadto, nagkasubo siya tungod kay manggaranon gid siya.
24 Sang makita ni Jesus nga nagkasubo siya, nagsiling siya, "Mabudlay gid para sa mga manggaranon nga magpasakop sa paghari sang Dios. 25 Mas mahapos pa nga mag-agi ang camel sa buho sang dagom sang sa magpasakop ang manggaranon sa paghari sang Dios." 26 Dayon nagpamangkot ang mga nakabati sang ginhambal ni Jesus, "Ti kon amo sina, sin-o na lang ang maluwas?" 27 Ginsabat sila ni Jesus, "Ang indi mahimo sang tawo mahimo sang Dios."