Ginhalad si Jesus sa Templo
22 Karon, nag-abot ang adlaw nga magahalad si Jose kag si Maria sa templo sa Jerusalem para tumanon ang Kasuguan ni Moises parte sa babayi nga bag-o nagbata para makabig siya nga matinlo. Kag gindala man nila ang bata sa Jerusalem para ihalad sa Ginoo. 23 Kay nasulat sa Kasuguan sang Ginoo, "Ang tagsa ka kamagulangan nga lalaki idedikar sa Ginoo."2:23 Exo. 13:2, 12 24 Kag para makabig si Maria nga matinlo, naghalad sila suno sa ginasiling sang Kasuguan sang Ginoo, "Duha ka pating ukon duha ka bataon nga tukmo."2:24 Lev. 12:8