Mateo 18

Sin-o gid ang Labaw sa Tanan?

1 Sang sadto nga tion, nagpalapit kay Jesus ang iya mga sumulunod kag nagpamangkot, "Sin-o gid bala ang labaw sa tanan nga nasakop sa paghari sang Dios?"*18:1 Dios: sa literal, langit. Amo man sa bersikulo 3, 4 kag 23. Tan-awa ang footnote sa 3:2. 2 Gintawag ni Jesus ang bata nga gamay kag ginpatindog niya sa ila tunga. 3 Dayon nagsiling siya, "Sa pagkamatuod, kon indi kamo magbag-o kag mangin pareho sa magagmay nga mga bata, indi gid kamo masakop sa paghari sang Dios. 4 Kay ang tawo nga nagapaubos pareho sa sini nga bata, amo ang labaw sa tanan nga nasakop sa paghari sang Dios.