Mateus 4

Ang Pagtentar kay Jesus

1 Pagkatapos sadto, gindala sang Espiritu Santo si Jesus sa kamingawan para tentaron sang yawa. 2 Sa sulod sang 40 ka adlaw kag 40 ka gab-i nagpuasa si Jesus, kag gin-gutom siya. 3 Nagpalapit sa iya ang manugtentar nga si Satanas kag nagsiling, "Kon ikaw ang Anak sang Dios, himua ini nga mga bato nga mangin tinapay." 4 Pero nagsabat si Jesus sa iya, "Nagasiling ang Kasulatan, ‘Indi lang sa pagkaon mabuhi ang tawo, kundi sa tagsa ka pulong sang Dios.’ "*4:4 Deu. 8:3

5 Dayon gindala siya sang yawa sa Jerusalem, ang balaan nga siyudad, didto sa pinakamataas nga parte sang templo. 6 Dayon nagsiling siya kay Jesus, "Kon ikaw ang Anak sang Dios, lukso ka paidalom. Kay nagasiling ang Kasulatan,

" ‘Suguon sang Dios ang iya mga anghel sa pagbantay sa imo.

Saluon ka nila para indi mapilas ang imo tiil sa bato.’ "*4:6 Sal. 91:11, 12

7 Pero ginsabat siya ni Jesus, "Nagasiling ang Kasulatan, ‘Indi pagtestingi ang Ginoo nga imo Dios.’ "*4:7 Deu. 6:16

8 Sa liwat gindala pa gid siya sang yawa sa mataas gid nga bukid, kag ginpakita sa iya ang tanan nga ginharian sang kalibutan kag ang iya sini gahom kag manggad. 9 Nagsiling ang yawa sa iya, "Ini tanan ihatag ko sa imo kon magluhod ka kag magsimba sa akon." 10 Dayon nagsiling si Jesus, "Palayo ka Satanas! Nagasiling ang Kasulatan, ‘Simbahon mo ang Ginoo nga imo Dios kag siya gid lang ang imo alagaron.’ "*4:10 Deu. 6:13

11 Dayon naghalin ang yawa, kag nag-abot ang mga anghel sang Dios kag nag-alagad kay Jesus.