8 Nagbasa sila sa Libro sang Kasuguan sang Dios kag ginpaathag ang kahulugan sini,8:8 ginpaathag ang kahulugan sini: Siguro lakip na diri ang pagtranslate sang Kasuguan halin sa Hebreo pakadto sa Aramico. para maintiendihan sang mga tawo.
9 Samtang nagapamati ang mga tawo sa ginasiling sang Kasuguan, nagahibi sila. Nagsiling sa ila si Nehemias nga gobernador, si Ezra nga pari kag manunudlo sang Kasuguan, kag ang mga Levita nga nagapaathag sa ila sang Kasuguan, "Ang ini nga adlaw balaan sa Ginoo nga inyo Dios, gani indi kamo maghibi." 10 Nagsiling pa gid si Nehemias, "Magselebrar kamo kag magkaon sang manamit nga mga pagkaon kag mag-inom sang manamit nga mga ilimnon. Hatagi ninyo ang mga wala sing pagkaon, kay ang ini nga adlaw balaan sa Ginoo. Kag indi kamo magpangasubo, kay ang kalipay nga ginahatag sang Ginoo makapabakod sa inyo." 11 Nagsiling man ang mga Levita, "Maghipos kamo! Indi kamo magpangasubo! Kay balaan ang ini nga adlaw." 12 Gani naglakat ang tanan nga tawo para magkaon kag mag-inom kag maghatag sang pagkaon sa iban. Nagselebrar sila nga may dako nga kalipay tungod kay naintiendihan nila ang mga mensahi sang Dios nga ginbasa sa ila.