Ipinga chiweghe ne imnyama mkali
1 Kuya katsa malaika yumwe kulawa mna wamalaika wala saba wane tsibakuli saba, kanongela, "Utse nikulanguse, pfayatsohighighwa pinga yula chiweghe mkulu iyokala hambalimbali mwe ghamatsi mengi. 2 Wandewa iwali muisi tsawawasa naye, na iwanu iwokala muisi tsawapatika mbwali ya ughoni wake."
3 Kuya Ghumuhe we Imulungu kanikinda, malaika kanongotsa mbaka kunyika. Hako nimwona ipinga iyakalile mchanya mwe imnyama mkali mdung’u, iyenele mataghwa gha ukumligha Imulungu, naye tsakana matwi saba na membe kumi. 4 Na pinga ayo tsakapfala maghwanda gha langi ya tsambalau na madung’u, tsakewamba kwa nzahabu na ghamadini ighong’ala na tsilulu. Naye kakinda chikombe cha nzahabu mmoko mwake, ichimemile ghehile na ughoni wake.