Ukwelekighwa kwa Yesu
1 Ghamatsuwa ghala Agusto, Imndewa wa Roma, tsakalaghitsa iwanu wose wa undewa wa Roma wapetighwe. 2 Aluno lwa mwanduso kwe iwanu kupetighwa, Kurenio hawile mkulu we isi ya Siriya. 3 Kuya, chila imunu kaghenda kune ghumji ghwake kwandikighwa taghwa lyake.
4 Yosefu kalawa ghumji ghwa Natsareti ighuli mna isi ya Galilaya, kaghenda ghumji ghwa Betilehemu ighuli mna isi ya Yudeya, hanu helekighwe mndewa Daudi. Yosefu kaghenda ako kwaapfila kalawila mne lukolo lwa Daudi. 5 Kaghenda na Mariya kupetighwa, ipinga yamlapfile tsengele, yakalile ne inda. 6 Hawang’ali wa Betilehemu, litsuwa lyake lya ukweleka lipfika, 7 keleka imwanaghe chaudele, kampfatsa pfibwende. Kuya kamuwasitsa mne ichibumbulika hanu hawajilagha iwanyama, kwaapfila ng’awapatile bae hanu ho kukala mne ing’anda ya iwahenza.
Wadimi we iwang’olo na Wamalaika
(Luk 2:8-20)
8 Mna isi iila tsakukala na wadimi iwang’ali wokalitsa imipfugho yawo nechilo. 9 Imalaika we IMNDEWA kawalawila, ne utunitso we IMNDEWA uwamwemwesela, nawo wapfuka ghendo. 10 Lekeni malaika ayo kawalongela, "Mleke ukupfuka! Niwaghalila imbuli inoghile, iitsowadeng’eletsa iwanu wose. 11 Leloli kune ghumji ghwa Daudi kelekighwa Mkombotsi wenu; yeye iyo Kiristu, IMNDEWA! 12 Achino chitsakuwa chitango kuna mwemwe. Mtsomwona imwana mdodo, wampfatsa ipfibwende, wamuwatsisa hanu ho kujila iwanyama."
13 Bahala, kingili kulu lye iwamalaika litingana ne malaika ayo, wamtunya Imulungu, walonga,
14 "Utunitso kwe Imulungu yali uchanya ng’ani kulanga,
na tseghamba kwe iwanu iwali mne isi yose iwanoghelighwe naye."
15 Iwamalaika awo hawoyile kulanga, wadimi welongela, "Tukeni Betilehemu tukalole acho ichilawile, chatulongele IMNDEWA."
16 Apfo watsuma, wawapfika Mariya na Yosefu, na ayula imwana mdodo kawasitsighwa hanu ho ukujila iwanyama. 17 Wadimi awo hawamwonile imwana yula, wawalongela mbuli tse imwana tsawalongile malaika. 18 Wose iwahulike agho, wakangawala na mbuli tsawalongile wadimi. 19 Lekeni Mariya kagheka agha ghose mna ghumoyo ghwake na kaghatonga ng’ani. 20 Awala iwadimi woya kunyika, wamtunya Imulungu na kumwimbila kwa ghose ghawahulike na ghawonile, ghose ghalawila ka malaika pfawalongele.