9 Yesu hayatsilihuke kulawa mne lifwa lupfilipfili mne litsuwa lya Jumapili, kamlawila Mariya Magidalena iyamlapfile ipfinyamkela saba. 10 Naye kaghenda kuwalongela wayaghe awala iwakalile na Yesu, iwang’ali wakona usungu na kulila. 11 Hawahulike Yesu katsilihuka na ipinga ayo kamwona, ng’awatoghole bae.
Yesu kowalawila iwanang’ina weli
(Luk 24:13-35)
12 Hambele Yesu kawalawila iwanang’ina wake weli aku kana chihanga chingi, hawang’ali woghenda kumghunda. 13 Nawo woya wawalongela wayawo. Lekeni nawo ng’awatoghole bae.
Yesu kowalawila iwanang’ina kumi na yumwe
(Mat 28:16-20; Luk 24:36-49; Yohn 20:19-23; Ghama 1:6-8)
14 Hambele chidogho Yesu kawalawila iwanang’ina kumi na yumwe hawang’ali wakuja. Kawakembela kwaapfila ng’awang’ali wotoghola bae na wasughu kuwatoghola awala iwamwonile kamghima. 15 Apfo kawalongela, "Mghende mne isi yose muwapetele Imbuli Inoghile wapfilumbe wose. 16 Imunu wowose iyotoghola na kubatitsighwa, katsokombolighwa, ila imunu wowose iyolema kutoghola katsohighighwa. 17 Na ipfitango pfino pfoghenda hamwe na awala iwotoghola, Kwa taghwa lyangu watsolapfa ipfinyamkela, na watsolonga kwa lugha ya sambi. 18 Hata wang’akinda iwanzoka na kunwa sumu ng’awatsolaghighwa bae. Watsowekila ghamoko ghawo iwatamu, nawo watsohona."
19 Yesu hayamalitse kulonga ne iwanang’ina wake, kasolighwa kulanga, kakala ghumoko ghwa kujilo ghwe Imulungu. 20 Kuya iwanang’ina wala waghenda chila hanu kupeta Imbuli Inoghile. Ne Imtwatsa kasang’ana nawo, kalangusa ka kahamwe nawo kwe ipfitango ipfighalile ne Imbuli ayo.