Dodogoro 7

Ka 144,000 tinoni tana Tamasa

1 Pa liguna sa vei inara sa qa batiria sa ka made mateana qai kole turu pana ka made uquna na kasia abana, ko qai aru vanogotoria sa ka made gava pa abana, ko kepore kai gava bi gava lao pa peso, pa kolo, beto pana gogou. 2 Beto sa qa batia mutugu ara sa kai goto mateana sa sale vei pa kale sagere tapo, sa pogosia na vinagigila tana na Tamasa toana, beto sa kuku viva laoria sira ka made mateana qai taiania na neqi ko mai vaqasai na peso beto na ivere. 3 Pira sau sa na mateana isa, <<Muke vaqasaria na peso, na ivere beto na gogou, koi vei mene vakoleniria mai tu na vinagigila pa readi sira na nabulu tana oda Tamasa,>> sau. 4 Ko qa nongoronia sa na anye vaikamudi ira qai tavakolenia na vinagigila tana Tamasa pana readi sa ira kai gogoto madengavulu ka made tina, na koko lame veidi pana ka manogarua doru bubutu Izireli.

5 Pa bubutu ti Jiuda ka manogarua tina qai tavakolenia na vinagigila,

pana bubutu ti Rubeni ka manogarua tina,

pana bubutu ti Qadi ka manogarua tina,

6 pana bubutu ti Asea ka manogarua tina,

pana bubutu ti Naputalai ka manogarua tina,

pana bubutu ti Manase ka manogarua tina,

7 pana bubutu ti Simione ka manogarua tina,

pana bubutu ti Livai ka manogarua tina,

8 pana bubutu ti Isaka ka manogarua tina,

pana bubutu ti Zabuloni ka manogarua tina,

pana bubutu ti Josepa ka manogarua tina,

pana bubutu ti Benijimani ka manogarua tina sa qai tavakolenia na vinagigila.