Atos 16

10 Isa tugu sa batia i Paula sa na dodogoro api poni sa qe qaqiri gu sagei ko me lao gu pa Masidonia qeu. Qe gigila vatalea sa na Tamasa tugu sa kukugei sagei ko mene lao vavakatonia na nongoro jongana tadira ketakoi qeu.

Na gabala ti Lidia pa Pilipae

11 Ego ko qe taloa pa gugusu Toroasi poni sa qe toka vatuvisi lao pa nusa Samoterake, ko sa bongi ko sa rane neqa poni sa qe lao paro pa Niapolisi. 12 Na kokomei ketakoi sa qe soloso lao pa Pilipae, isa kai gugusu qai suveria ira na tinoni Romu beto ko kai gugusu poreveveina tugu pa pikata gugusu pa Masidonia. Ko qe suveremei mai tu ka vivisa rane ketakoi sagei.

13 Ko pa rane Minere sa qe votu lao pa kekete gugusu pa taqelena na ovuku ketakoi qe rorove veinia palu kai ia vavaikamu vavarana sa qeu. Ko qe lao toqo ko qe kole vavavakato lao tadira na rereko qai lame vaikamu ketakoi. 14 Ego ko kame ira na rereko na isongona i Lidia, na rereko pa Tuateira ko nona roiti sa sa vavainiria na poko kala davala, sa sa kole vainongoro ketakoi. Na rereko isa sa na neqina nona rarange tana Tamasa, ko na Bangara sa revangia na bulona sisa ko sa vataberia sira na paranga sa pojaria i Paula. 15 Ko pa liguna sa tapaputaiso sisa beto ira doru pa ona tatamana, poni sa sa ruti vivitigigei sisa, pira sau, <<Vei muna tei doro vasosoto veinisiu kai tinoni qa rangea tugu na Tamasa sara, poni sa mu lame suvere mai tugu pa ruma taqu,>> saunigei. Ko sake vabokagei ko qe vasotoa gu.

Ira Paula i Saelasi pa ruma vaipiu pa Pilipae

16 Ego kai rane sa totonai qe korapa rerege lao pa ia vavarana sagei, sa sa gosorogei kai pinausu rereko sa kolea na gagala ikikerena. Pana kokorotai sa roroitiniria na rereko isa sa sa vaisisongoria sira nona bangara. 17 Sa tututia isa si Paula beto agei ko sa kole kukukunigei, pira sau, <<Ira ka visa tinoni pira sa na nabulu tana Tamasa ululuna jola. Qai korapa taraenia ira tamugou sa na soanana vei beto mina taalo na tinoni,>> sau.