21 Sa vaitoto vei tugu sa vatoa muleria na Tamana sira qai tei matedi tu ko sa vaniria na toa, poni sa na Tuna ba sa vaniria tugu na toa sira sa nyorogua vaniria. 22 Na Tamana mekana ba sake pitua kai tinoni, goto sa tei ia lao vania tu na Tuna sa na neqi ko na Tuna sa mina pituria sira na tinoni. 23 Ko mai valavatia ira doru tinoni sa na Tuna, vaitoto vei tugu qai valavatia ira sa na Tamana. Na tinoni sake valavatia na Tuna sa sake valavatia tugu sa na Tamana isa sa garunia sa na Tuna.

24 Sosoto pa sosoto ma pojanigou ara sagou: isa sa nongororia na qua paranga beto sa vasosotoa sisa sa garunusiu ara, sa sa tekua na toa jola ko minake tapitu sisa; goto sa tei jolania tu isa sa na mate ko sa tei karovo lao tu pa toa. 25 Sosoto pa sosoto ma pojanigou ara sagou: sa korapa lalameona sa na totoso, ko kopira tugu sa na totoso isa, tonai mai nongoria ira na tinoni qai tei matedi tu sa na ovovelena na Tuna na Tamasa, ko ira mai nongoria sa mai toa. 26 Ura na Tamana mekana sa na kutana na toa, beto ko sa tei vania tu na neqi vei sa na Tuna ko na Tuna tugu sa na kutana na toa. 27 Beto sa vania tugu vei na Tuna sa na neqi ko na Tuna mina boka pituria sira na tinoni, ura na Tuna na Tinoni sisa.

28 Muke gabarania sisa qa pojanigou api; ura sa korapa lalameona sa na totoso tonai kode mai nongoria ira qai tei tagolomo tu sa na ovovelena isa. 29 Ko mai okoto votu ketakoi qai tagolomo sira ko ira qai roiti vatale sa kode mai turu mule ko mai tekua na toa jola, goto ira qai roitinia nikerena sa mai turu mule ko mai tapitu,>> sau si Jisu.

30 <<Ara qake boka roitinia kai sa pa qua neqi mekaqu; ba isa gu vei qa nongoria tana Tamaqu sa qa pitua ko na qua vaipitu sa na tuvisina, ura qake tutia na qua roroqu mekaqu goto na nyorogua tu tana isa sa garunusiu sa qa tutia. 31 Vei ba ule mulenisiu mekaqu sara, poni sa na qua ulule sa bike pada tavasosoto.