33 Ko totonai qai kamu sira pa kai ia na isongona pa Batu Tomate sa qai vamatea pa korosi ketakoi si Jisu, beto ko vei tugu ira karu tinoni ikikeredi, kame keta pa kale matuana beto kame keta pa kale merina. 34 Sa paranga si Jisu, <<Tamaqu, mu taleosoniria, ura qaike gigilai ira sa na manugu qai roitinia ira,>> sau sisa. Beto qai gonania ira na solodia sa na patu vivile beto qai tekua ira sa na ona poko.

35 Ko na minete tinoni sa qai kole gu turu dodogoro lao. Goto ira na mamata tadira Jiu sa qai kole vavaledenia beto qai kole ngangangulia si Jisu, pira qarigu, <<Na goto tinoni tu sa sa aloria isa. Ego, kopira sa mi alo mulenia tu mekana vei mina isa sosoto tugu sa na Karisito tana Tamasa, isa na tavilena!>> qarigu.

36 Ira na solodia ba qai vavaledenia tugu sisa, beto qai vania na vaini pasana, 37 beto qai paranga laoa ira sisa, <<Vei mina Bangara tugu tadira na Jiu sao, sa mu alo mulenigo!>> qarigunia. 38 Keta pa batuna na korosi pa narena isa sa sa takuti sira na paranga aipira, na tinajutuna isa. Pira sau: NA BANGARA TADIRA NA JIU SA API!

39 Ego kame ira karu na tinoni ikikerena sa tavatiti pana kai korosi ketakoi, sa sa paranga vivikere laoa isa, <<Qokolo, nake Karisito sao? Mu alogo mekamu beto agei karu tugu vei!>> sau.

40 Ba kame ira karu sa sa tokea sisa sa koni paranga ina, pira saunia, <<Qokolo, quke matagutunia ao sa na Tamasa? Ao kisa ba qu tavakilasa vei tugu sa vei isa. 41 Ba gita karu sa na padada tugu tana tavakilasa, ura gita karu sa taqe taiania na laedi ira na oda roiti ikikeredi. Goto na tinoni api sa kepore ona sela,>> sau.

42 Beto sa sa paranga laoa si Jisu, <<Jisu, mu roroqusiu totonai muna lame vei na Bangara,>> sau.

43 Poni sa oe laoa i Jisu sisa, <<Ma poja sosotonigo ara sao: pa ngeni tugu api muna somana tavitisiu ara pa gusu jojonga sao,>> sau si Jisu.