Lucas 8

49 Totonai tugu sa korapa paranga vei inara i Jisu poni sa sa bola kamu gu sa kai tinoni pogoso nongoro, na koko lame veina pa ruma tai Jaerasi na tinoni mamata pa ruma vavaikamuna, ko pira sau, <<Sa tei mate tu sa na tumu rereko. Kita vapavu lame goboria na tinoni vaivagigalai,>> saunia si Jaerasi.

50 Ba tonai sa nongoria i Jisu sa na vavakato tana tinoni pogoso nongoro, poni pira saunia si Jaerasi, <<Muke matagutu. Mu vasosoto gu beto kode mina jonga gu sa na tumu,>> saunia.

51 Totonai sa lao kamu sisa pa ruma tai Jaerasi, sa sake vamalumuria isa ko mai tome tavitia sira na tinoni, goto ira Pita, i Jone, i Jekopi, beto ko ira karu tinana na tamana gu na rereko. 52 Ira doru tinoni sa qai korapa roroma qai lukana takulangania na koburu sa mate. Poni pira sauniria i Jisu sira, <<Muke lukana! Zake mate sa na koburu inana, sa korapa putagana gu,>> sau sisa.

53 Tonai sa paranga vei inara isa poni sa qai avavunia ira doru sisa, ura qai gigila vataleadia sa tei mate tu sa na koburu rereko. 54 Ba sa arua i Jisu sa na limana na koburu beto sa paranga, <<Ngore, mu tatakole!>> saunia. 55 Poni sa toa mule ko sake ruavo tugu tatakolena sa na koburu ko sa garunuria i Jisu sira ko mai vania na gagani ko mi teteku sau. 56 Ko qai gabara vivitigi sira karu na tamana beto na tinana, ba sa paranga vabalauria i Jisu sira ko maike vavavakatonia pa tinoni sisa vei na roiti sa taroiti.