Maka 5

35 Totonai sa korapa paranga si Jisu, sa qai bobola kamu gu sira kaki tinoni na koko lame veidi pa ruma tai Jaerasi na tinoni mamata pa ruma vavaikamuna, ko pira qarigunia si Jaerasi, <<Na tumu rereko sa kopira sa tei mate tu. Kita vapavu lame goboria na tinoni vaivagigalai,>> qarigu sira.

36 Ba i Jisu sake pavu nongoria sa na paranga qai pojai ira, goto tonai sa pira saunia gu sa na tinoni mamata pa ruma vavaikamuna, <<Muke matagutu, mu vasosoto gu,>> sau sisa.

37 Ego ko kepore sa kai tinoni sa vamalumu tutia isa, goto mekadi gu ira Pita, i Jekopi beto ko i Jone na tasina gu i Jekopi. 38 Tonai qai lame kamu pa ruma tana tinoni mamata pa ruma vavaikamuna, sa sa batia i Jisu sa na rura takulangadi ira na tinoni qai roroma beto qai lukana kekebo. 39 Ko sa tome sisa ko pira sauniria, <<Ai sa vei ko qu rura takulanga beto qu korapa kekebo roroma tu sagou? Na koburu ina sa sake mate, goto sa korapa putagana gu,>> sauniria. 40 Tonai sa paranga vei isa poni sa qai avavunia ira na tinoni sisa.

Ego ko sa iju vavoturia i Jisu sira doru, goto na tinana gu beto na tamana na koburu beto ira kue ona sepele gu sa sa toni tomeniria ketakoi sa kole na koburu. 41 Beto sa arua i Jisu sa na limana na koburu beto pira saunia, <<Talita, kumi,>> sau (Na ginuana sa, <<Ngore, qa parangigo ara sao, mu tatakole!>> sau). 42 Pa totoso tugu isa sa tatakole sa na rereko ikete api ko sa reregeona, ura sa tei manogarua aorona tu sa na rereko isa. Ko qai gabara vivitiginiria sira na tinoni. 43 Ba sa naqu vaneneqiria i Jisu sira ko maike vavakatonia tana kai tinoni sa isa vei sa taroiti alepi sau. Beto sa garunuria ko mai vania kaki sava sa na koburu rereko ko mi tetekuona sauniria.