Mateus 25

Na Vavakato Vavapadadi ira ka Manogaputa Rereko

1 <<Pana totoso isa sa na binangara pa noka sa kode pira mina vei. Koledia sira ka manogaputa rereko koregadi qai okoto pogosoria na dia juke ko mai lao gosoria sa na tinoni mina vaialava tonai mina lame ko mina tekua na maqotana qarigu. 2 Ira ka lima sa na duduvilidi goto ira ka lima sa na tavagigaladi. 3 Ira ka lima duduvilidi qaike pogoso vatananiria na oela sa na dia juke. 4 Goto ira na tavagigaladi sa qai pogosoria na dia juke beto qai okoto toto pogoso vatananiria pa dia tototodi sa na oela. 5 Ego sa vavabongi na kamuna sa na tinoni vaialava, ko qai doki ko qai puta beto sira doru.

6 Ko sa tei vaikorapai bongi tu neqa, sa sa tanongoro sa na kuku, <Vainongoro! Api sa na tinoni vaialava! Mu votu lame gosoria!> qarigu.

7 Poni qai okoto sasuru dorava beto sira ka manogaputa rereko koregadi ko qai okoto piju vatoaria sa na dia juke. 8 Beto sa ira ka lima rereko duduvilidi pira qai paranga laoria sira ka lima tavagigaladi, pira qarigu, <Muna vanigei tu kaki miu oela, ura iapeki gu mina pidili gagapu na mei juke sagei,> qarigu.

9 Ba qai oe lao sira na tavagigaladi, <Dai, ura nake padada gita doru sira na mei oela pira. Goto mu mule lao vai beimiu tadira qai vavai oela,> qarigu sira.

10 Ego ko pa ligudi tu qai korapa riu nyaqo oela ira ka lima rereko duduvilidi pira, sa sa kamu gu sa na tinoni vaialava. Ko ira ka lima rereko tavagigaladi qai tei vatana vakoledia tu sa qai tome lao tavitia isa pa vavolo vaialava. Ko qai tome beto ira sa sa tapatei gu sa na atakamana.

11 Ko liligu tu beto sa qai kamu sira ka lima rereko koregadi duduvilidi. Ko qai kamu kole kukuku, pira qarigu, <Bangara! Bangara! Mu revanga vanigei!> qarigu.

12 Ba sa oe laoria na tinoni vaialava sira, <Ma poja sosotonigou ara sagou: qake isongo gigilagou ara sagou,> sauniria na tinoni vaialava.

13 Ko sa vei sa mu suvere gegele, ura quke gigilai agou sa na ranena beto na totoso tonai mina lame na Tuna na Tinoni,>> sau si Jisu.