Matiu 25

Na Tuna na Tinoni mina Tutiniria ira Dodoru tinoni

31 <<Tonai mina lame pana neqi tana bangara sa na Tuna na Tinoni sa kode mai tutia ira doru mateana, ko mina toqo pa ona totoqona bangara sisa. 32 Ko ira doru puku tinoni sa mai vaikamu lao pa moena isa. Ko isa mina vaipikainiria pa karu pikatana kai muqisi podeke vei na sepati sa vile pikata tekuria na sipi tadira na qoti. 33 Ko mina vakoleniria pa kale matuana sira na tinoni tuvisidi, goto ira na tinoni ikikeredi sa mina vakoleria pa kale merina.

34 Beto sa mina parangaria na bangara sira na tinoni pa kale matuana, <Mei, lame agou sa mananigou na Tamaqu! Mu teku isongia na binangara, isa sa vatana vakole vanigou na Tamasa pa popodalaina tu tonai sa taroiti na kasia gusu. 35 Ura tonai qa burana ara sa qu iasiu, qa kidepe sara sa qu vabukusiu, na tinoni gotoqu sara ba qu vatoga vatalesiu agou pa miu ruma. 36 Na gagadoqu, ba qu vapopokosiu; qa mo, ba qu kopunisiu agou; tonai qa tapiu, ba qu ovikisiu tugu agou,> minagu.

37 Poni mai oea ira na tinoni tuvisidi, pira marigu, <Bangara, pa visa sa qu burana ao ko qe iago agei? Toto sa sa qu kidepe ao sa qe lao vanigo na pie agei? 38 Pa visa sa na tinoni gotomu qeunigo, ko qe vatogaigo pa mei ruma agei? Beto pa visa qe batigo na gagadomu ko qe vapopokogo agei? 39 Toto sa sa qe batigo qu korapa momoomu ao beto ko pa visa sa na suveremu pa ruma vaipiu ko qe lalao ovikigo agei?> marigu.

40 Poni mina oeria na Bangara sira, pira minaguniria, <Ma poja sosotonigou ara sagou: tonai qu roiti laonia agou kai roiti jongana tana kame ira na tasiqu nake poreveveidi aipira, sa qu korapa tugu roiti valame vanisiu ara sisa,> minagu.

41 Beto sa mina paranga laoria isa sira pa kale merina, pira minagu, <Mu taloa taqu sagou, agou sa sa tei lelevenigou tu na Tamasa. Mu lao pa iku kole jolana isa sa tavatana vakole vania na bangaradi na tomate beto ko ira doru ona mateana! 42 Ura tonai qa burana sara, ba quke isongo ia podekesiu tugu ara sagou; tonai qa kidepe, ba quke vabukusiu; 43 tonai na tinoni gotoqu tugu sara, ba quke vatogasiu pa miu ruma ara sagou; na gagadoqu tugu, ba quke vapopokosiu ara sagou; tonai na momooqu tugu beto na tapiuqu tugu pa ruma vaipiu, ba quke galanisiu sara,> sau sisa.

44 Poni sa mai oea ira sa na Bangara, pira marigu, <Bangara, toto sa sa qe batigo agei qu kole burana, na kidepe, na tinoni gotomu, na gagadomu, qu mo, babi qu tapiu ao, beto qeke pavu galanigo na tokanigo agei?> marigu sira.

45 Poni mina oeria na Bangara sira, pira minagu, <Ma poja sosotonigou ara sagou: tonai qu daimiu tokania sa kame ira nake poreveveidi aipira, sa qu daimiu tokanisiu tugu sara,> minaguniria.

46 Ko ira na tinoni ikeredi aipira sa mai tavalao pa vinakilasa kole jolana, goto ira na tinoni tuvisidi sa mai lao pa toa jola,>> sau si Jisu.