1 जब पिन्तेकुस्त को दिन मतलब पचासवो दिन आयो, त हि सब विश्वासी एक जागा म जमा होतो। 2 अचानक आसमान सी बड़ी आन्धी को जसो सनसनाहट को आवाज भयो, अऊर ओको सी पूरो घर गूंजन लग्यो जित हि बैठ्यो होतो। 3 अऊर उन्ख आगी को जसी जीबली फटती हुयी दिखायी दी अऊर ओको म सी हर एक पर आय ठहरी। 4 हि सब पवित्र आत्मा सी भर गयो, अऊर जो तरह आत्मा न उन्ख बोलन की सामर्थ दी, हि अलग अलग भाषा बोलन लग्यो।

5 आसमान को खल्लो को सब राष्ट्रों सी आयो हुयो हर तरह की भाषा बोलन वालो यहूदी भक्त ऊ समय यरूशलेम म रहत होतो। 6 जब यो आवाज भयो त भीड़ लग गयी अऊर लोग अचम्भित भय गयो, कहालीकि हर एक ख योच सुनायी देत होतो कि ऊ मोरीच भाषा म बोल रह्यो हंय। 7 हि सब चकित अऊर उलझन म होय क कहन लग्यो, "देखो, हि जो बोल रह्यो हंय का सब गलीली नोहोय का? 8 त फिर कहाली हम उन्को मुंह सी हर एक अपनी अपनी जनम स्थान की भाषा सुनय हय? 9 हम जो पारथी अऊर मेदी अऊर एलामी अऊर मेशोपोटामियां अऊर यहूदिया अऊर कप्पदूकिया अऊर पुन्तुस अऊर आसिया, 10 अऊर फ्रूगिया अऊर पंफूलिया अऊर मिस्र अऊर लीबिया देश जो कुरेनी को आजु बाजू हय, इन सब देशों को रहन वालो अऊर रोमी प्रवासी, 11 यानेकि यहूदी अऊर यहूदी बिचार धारन करन वालो, क्रेती अऊर अरबी भी हंय, पर अपनो अपनो भाषा म उन्को सी परमेश्वर को बड़ो बड़ो कामों की चर्चा सुनय हंय।" 12 अऊर हि सब अचम्भित भयो अऊर उलझन म एक दूसरों सी कहन लग्यो, "यो का होय रह्यो हय?"

13 पर दूसरों न मजाक उड़ाय क कह्यो, "हि त पी क नशा म चूर हंय।"

14 तब पतरस उन ग्यारा प्रेरितों को संग खड़ो भयो अऊर ऊचो आवाज सी कहन लग्यो, "हे यहूदियों अऊर हे यरूशलेम को सब रहन वालो, यो जान लेवो, अऊर कान लगाय क मोरी बाते सुनो।" 15 जसो तुम समझ रह्यो हय, हि लोग नशा म नहाय, कहालीकि अभी त सबेरे को नवच बज्यो हय। 16 पर वा या बात आय, जो योएल परमेश्वर सी सन्देश लावन वालो को द्वारा कहीं गयी होती:

17 "परमेश्वर कह्य हय, कि आखरी को दिनो म असो होयेंन कि

मय अपनी आत्मा पूरो आदमियों पर उंडेलूं,

अऊर तुम्हरो बेटा अऊर तुम्हरी बेटियां

परमेश्वर को तरफ सी भविष्यवानी करेंन, अऊर तुम्हरो जवान दर्शन देखेंन,

अऊर तुम्हरो बुजूर्ग लोग सपनो देखेंन।"

18 बल्की मय अपनो सेवकों अऊर अपनी दासियों पर भी

"उन दिनो म अपनी आत्मा म सी उंडेलूं,

अऊर हि परमेश्वर को तरफ सी भविष्यवानी करेंन।

19 अऊर मय ऊपर आसमान म चमत्कार

अऊर खल्लो धरती पर चिन्ह दिखाऊं,

यानेकि खून अऊर आगी अऊर धुवा को बादर दिखाऊं।

20 प्रभु को महान अऊर महिमामय दिन को आवन

सी पहिले सूरज अन्धारो अऊर चन्दा खून को जसो लाल

होय जायेंन।

21 अऊर जो कोयी प्रभु को नाम सी पुकारेंन, ऊ उद्धार पायेंन।"

22 "हे इस्राएलियों, या बाते सुनो: यीशु नासरी एक आदमी होतो जेको परमेश्वर को तरफ सी होन को सबूत उन सामर्थ को कामों अऊर अचम्भा को कामों अऊर चिन्हों सी प्रगट हय, जो परमेश्वर न तुम्हरो बीच ओको सी कर दिखायो जेक तुम खुदच जानय हय।" 23 ✝२:२३ मत्ती २७:३५; मरकुस १५:२४; लूका २३:३३; यूहन्ना १९:१८उच यीशु ख, जो परमेश्वर की ठहरायी हुयी योजना अऊर पहले को ज्ञान को अनुसार पकड़वायो गयो, तुम न अधर्मियों को हाथ सी क्रूस पर चढ़ाय क मार डाल्यो। 24 ✝२:२४ मत्ती २८:५,६; मरकुस १६:६; लूका २४:५पर ओखच परमेश्वर न मरन को बन्धनों सी छुड़ाय क जीन्दो करयो; कहालीकि यो असम्भव होतो कि ऊ ओको वश म रहतो। 25 कहालीकि दाऊद ओको बारे म कह्य हय,

"मय प्रभु ख हमेशा अपनो सम्मुख रख्यो हय:

येकोलायी कि ऊ मोरी दायो हाथ को तरफ रह्य हय, मय कभी नहीं डगमगाऊं।

26 योच वजह मोरो दिल बहुत खुश

अऊर मगन भयो;

मोरो शरीर भी

आशा सी रहेंन।

27 कहालीकि तय मोरो जीव ख अधोलोक म नहीं छोड़जो;

अऊर नहीं अपनो पवित्र भक्त ख सड़न देजो।

28 तय मोख जीवन को रस्ता बतायजो;

तोरो आगु खुशी की भरपूरी हय, तोरो दायो हाथ म सुख हमेशा बन्यो रह्य हय।"

29 "हे भाऊवों, मय पुर्वज दाऊद को बारे म तुम सी हिम्मत को संग कह्य सकू हय कि ऊ त मर गयो अऊर गाड़्यो भी गयो अऊर ओकी कब्र अज तक हमरो यहां मौजूद हय।" 30 ऊ भविष्यवक्ता होतो, ऊ जानत होतो कि परमेश्वर न मोरो सी कसम खायी हय कि मय तोरो वंश म सी एक लोग ख तोरो आसन पर बैठाऊं; 31 ओन होन वाली बात ख पहिलेच सी देख क मसीह को जीन्दो होन को बारे म भविष्यवानी करी की

"ओको जीव न त अधोलोक म छोड़्यो गयो अऊर

न ओको शरीर सड़नो पायो।"

32 योच यीशु ख परमेश्वर न जीन्दो करयो, जेको हम सब गवाह हंय। 33 यो तरह परमेश्वर को दायों हाथ सी मुख्य पद पा क, अऊर बाप सी ऊ पवित्र आत्मा प्राप्त कर क् जेकी प्रतिज्ञा करी गयी होती, ओन यो उंडेल दियो हय जो तुम देखय अऊर सुनय हय। 34 कहालीकि दाऊद त स्वर्ग पर नहीं चढ़्यो; पर ऊ खुद कह्य हय,

"प्रभु न मोरो प्रभु सी कह्यो,

मोरो दायों बैठ,

35 जब तक कि मय तोरो दुश्मनों ख तोरो पाय को खल्लो की चौकी नहीं कर देऊं।"

36 "येकोलायी अब इस्राएल को पूरो घरानों निश्चित रूप सी जान ले कि परमेश्वर न उच यीशु ख जेक तुम न क्रूस पर चढ़ायो, प्रभु भी ठहरायो अऊर मसीह भी।"

37 तब सुनन वालो को दिल छिद गयो, अऊर हि पतरस अऊर बच्यो प्रेरितों सी पूछन लग्यो, "हे भाऊ, हम का करबो?"

38 पतरस न उन्को सी कह्यो, "मन फिरावो, अऊर तुम म सी हर एक अपनो अपनो पापों की माफी लायी यीशु मसीह को नाम सी बपतिस्मा ले; त तुम पवित्र आत्मा को दान पावों। 39 कहालीकि या प्रतिज्ञा तुम, अऊर तुम्हरी सन्तानों, अऊर उन सब दूर दूर को लोगों लायी भी हय जिन्ख प्रभु हमरो परमेश्वर अपनो जवर बुलायेंन।"

40 ओन बहुत अऊर बातों सी भी गवाही दी अऊर बिनती कि अपनो आप ख यो कुटिल जाति सी बचाव। 41 येकोलायी जिन्न ओको वचन स्वीकार करयो उन्न बपतिस्मा लियो; अऊर उच दिन तीन हजार आदमी को लगभग उन्म मिल गयो। 42 अऊर हि प्रेरितों सी शिक्षा पावन, अऊर संगति रखन, अऊर रोटी तोड़न, अऊर प्रार्थना करन म लौलीन रह्यो।

43 अऊर सब लोगों पर डर छाय गयो, अऊर बहुत सो अचम्भा को चिन्ह अऊर चमत्कार प्रेरितों सी होत होतो। 44 ✝२:४४ प्रेरितों ४:३२-३५अऊर सब विश्वास करन वालो जमा रहत होतो, अऊर उनकी सब चिजे साझा म होती। 45 हि अपनी अपनी जायजाद सामान बिक-बिक क जसी जेकी जरूरत होत होती बाट दियो जात होतो। 46 हि हर दिन एक मन होय क मन्दिर म जमा होत होतो, अऊर घर-घर रोटी तोड़तो हुयो खुशी अऊर सच्चो मन सी जेवन करत होतो, 47 अऊर परमेश्वर की स्तुति करत होतो, अऊर सब लोग उन्को सी खुश होतो : अऊर जो उद्धार पात होतो, उन्ख प्रभु हर दिन उन्म मिलाय देत होतो।