Marcos 10

तलाक को बारे म यीशु की शिक्षा

1 तब यीशु न उत सी उठ क यहूदिया प्रदेश को सीमा म अऊर यरदन नदी को पार आयो। अऊर भीड़ ओको जवर फिर सी जमा भय गयी, अऊर ऊ अपनो रीति को अनुसार उन्ख फिर सी सिखावन लग्यो।

2 तब फरीसियों न ओको जवर आय क ओकी बातों म फसावन लायी ओको सी पुच्छ्यो, "का हमरो नियम को अनुसार यो ठीक हय कि आदमी ख अपनी पत्नी ख छोड़चिट्ठी देन कि अनुमति देवय हय?"

3 यीशु न उन्ख उत्तर दियो, "कि मूसा न तुम्ख का आज्ञा दियो हय?"

4 ✝ १०:४ मत्ती ५:३१ मूसा न अनुमति दियो हय कि, "छोड़चिट्ठी लिख क देन अऊर छोड़न की आज्ञा दियो हय।"

5 यीशु न उन्को सी कह्यो, "तुम्हरो मन की कठोरता को वजह मूसा न तुम्हरो लायी यो आज्ञा लिख्यो।" 6 पर शास्त्र म लिख्यो हय सुरूवात सी परमेश्वर न नर अऊर नारी कर क् उन्ख बनायो हय। 7 येकोलायी आदमी अपनो माय-बाप सी अलग होय क अपनी पत्नी को संग रहेंन, 8 अऊर हि दोयी एक शरीर होयेंन; येकोलायी हि अब दोय नहीं पर एक शरीर हंय। 9 येकोलायी "जेक परमेश्वर न जोड़्यो हय ओख आदमी अलग नहीं करे।"

10 हि जब घर गयो त चेलावों न येको बारे म यीशु सी पुच्छ्यो। 11 ✝१०:११ मत्ती ५:३२; १ कुरिन्थियों ७:१०,११ओन उन्को सी कह्यो, "जो कोयी अपनी पत्नी ख छोड़ क दूसरी सी बिहाव करय हय त ऊ अपनी पहिली पत्नी को विरोध म व्यभिचार करय हय। 12 अऊर एक पत्नी जो अपनो पति ख छोड़ क दूसरों सी बिहाव करय त वा भी व्यभिचार करय हय।"

यीशु न बच्चां ख आशीर्वाद दियो

13 तब लोग बच्चां ख यीशु को जवर लान लग्यो कि ऊ ओख छूवय, पर चेलावों न लोगों ख डाट्यो। 14 यीशु न यो देख गुस्सा म होय क उन्को सी कह्यो, "बच्चा ख मोरो जवर आवन देवो अऊर उन्ख मना मत करो, कहालीकि परमेश्वर को राज्य असोच को हय। 15 ✝१०:१५ मत्ती १८:३मय तुम सी सच कहू हय कि जो कोयी परमेश्वर को राज्य ख बच्चा को जसो स्वीकार नहीं करय, ऊ उन्म कभी नहीं सिर पायेंन।" 16 तब ओन बच्चां ख गोदी म लियो, अऊर उन पर हाथ रख क आशीर्वाद दियो।

धनवान आदमी

17 जब यीशु उत सी निकल क रस्ता म जाय रह्यो होतो, त एक आदमी ओको जवर दौड़ क आयो, अऊर ओको आगु घुटना पर होय क ओको सी पुच्छ्यो, "हे उत्तम गुरु, अनन्त जीवन पावन लायी मय का करू?"

18 यीशु न ओको सी कह्यो, "तय मोख उत्तम कहालीकि कह्य हय?" केवल परमेश्वर ख छोड़ क। "कोयी भी उत्तम नहाय। 19 तय परमेश्वर कि आज्ञा ख त जानय हय: ‘हत्या नहीं करनो, व्यभिचार नहीं करनो, चोरी नहीं करनो, झूठी गवाही नहीं देनो, छल नहीं करनो, अपनो बाप अऊर अपनी माय को आदर करनो।’"

20 ओन यीशु सी कह्यो, "हे गुरु, इन सब ख मय छोटो होतो तब सी मानतो आयो हय।"

21 यीशु न प्रेम सी ओको तरफ देख क कह्यो, "तोरो म एक बात की कमी हय। जा, जो कुछ तोरो हय ओख बेच क गरीबों ख दे, तब तोख स्वर्ग म धन मिलेंन, तब आय क मोरो पीछू चल।" 22 ऊ आदमी या बात ख सुन क ओको चेहरा पर उदासी छाय गयी, अऊर ऊ दु:खी होय क चली गयो, कहालीकि ऊ बहुत धनी होतो।

23 यीशु न चारयी तरफ देख क अपनो चेलावों सी कह्यो, "धनवानों ख परमेश्वर को राज्य म सिरनो कितनो कठिन हय!"

24 हि चेला ओको बातों सी अचम्भित भयो। येको पर यीशु न फिर सी उन्को सी कह्यो; "हे बच्चा, जो धन पर भरोसा रखय हय, उन्को लायी परमेश्वर को राज्य म सिरनो कितनो कठिन हय? 25 परमेश्वर को राज्य म अमीर आदमी को सिरनो सी ऊंट लायी सूई को नाक म सी होय क निकल जानो सहज हय!"

26 चेला बहुतच अचम्भित होय क आपस म कहन लग्यो, "त फिर कौन को उद्धार होय सकय हय?"

27 यीशु न उन्को तरफ देख क कह्यो, "यो आदमी लायी असम्भव हय, परमेश्वर लायी नहाय, पर परमेश्वर लायी सब कुछ सम्भव हय।"

28 पतरस ओको सी कहन लग्यो, "देखो, हम त सब कुछ छोड़ क तोरो पीछू भय गयो हय।"

29 यीशु न कह्यो, "मय तुम सी सच कहू हय कि असो कोयी नहाय, जेन मोरो अऊर मोरो सुसमाचार को लायी घर यां भाऊ-बहिनों यां माय-बाप यां बालबच्चा यां खेतो ख छोड़ दियो हय, 30 अऊर अब यो समय को जीवन म सौ गुना मिलेंन, घर अऊर भाऊ-बहिन अऊर माय अऊर बालबच्चा अऊर खेतो म, पर सताव को संग अऊर आवन वालो युग म अनन्त जीवन मिलेंन। 31 ✝१०:३१ मत्ती २०:१६; लूका १३:३०पर बहुत सो जो आगु हंय, हि पीछू होयेंन, अऊर जो पीछू हंय, हि आगु होयेंन।"

यीशु न तीसरी बार अपनो मरन की भविष्यवानी करी

32 हि यरूशलेम ख जातो हुयो रस्ता म होतो, अऊर यीशु उन्को आगु-आगु चल रह्यो होतो : चेला घबरायो हुयो होतो अऊर जो लोग ओको पीछू-पीछू चल रह्यो होतो हि डरयो हुयो होतो। तब ऊ फिर उन बारयी चेलावों ख अलग लिजाय क उन्को सी जो बात ओको पर घटन वाली होती ओख बतावन लग्यो। 33 "सुनो, हम यरूशलेम जाय रह्यो हंय, जित आदमी को बेटा मुख्य याजकों अऊर धर्मशास्त्रियों को हाथ सौंप दियो जायेंन। अऊर हि ओख मारन लायी दोष लगायेंन। अऊर फिर गैरयहूदियों को हाथ म सौंप दियो जायेंन। 34 हि ओकी मजाक उड़ायेंन, ओको पर थूकेंन, ओख कोड़ा सी मार क ओख मार डालेंन, अऊर तीन दिन बाद ऊ फिर सी जीन्दो होयेंन।"

याकूब अऊर यूहन्ना की बिनती

35 तब जब्दी को दोय टुरा याकूब अऊर यूहन्ना यीशु को जवर आय क कह्यो, "हे गुरु, हम चाहजे हंय कि जो कुछ हम तोरो सी मांगबो, ऊ तय हमरो लायी करे।"

36 अऊर यीशु न कह्यो, "तुम का चाहवय हय कि मय तुम्हरो लायी करू?"

37 उन्न यीशु सी कह्यो, "जब तुम अपनो महिमामय राज्य को सिंहासन पर बैठ्यो, तब हम असो चाहवय हय कि हम म सी एक तोरो दायो तरफ अऊर दूसरों तोरो बायो तरफ बैठे।"

38 ✝ १०:३८ लूका १२:५० यीशु न उन्को सी कह्यो, "तुम नहीं जानय कि का मांग रह्यो हय? जो दु:ख को कटोरा मय पीवन पर हय, का तुम पी सकय हय? अऊर जो मरन को बपतिस्मा मय लेन पर हय, का तुम ले सकय हय?"

39 उन्न ओको सी कह्यो, "हम सी होय सकय हय।"

यीशु न उन्को सी कह्यो, "जो दु:ख को प्याला मय पीवन पर हय, तुम भी पीवो; अऊर जो मरन को बपतिस्मा मय लेन पर हय, ओख तुम भी लेवो। 40 पर मोरो अधिकार नहाय कि मय कौन ख चुनू कि कौन कित बैठेंन, केवल परमेश्वरच ओको लायी जागा तैयार करेंन कि कौन मोरो दायो अऊर बायो बैठेंन।"

41 यो सुन क दसो चेलावों याकूब अऊर यूहन्ना की बातों पर नाराज भय गयो। 42 ✝१०:४२ लूका २२:२५,२६तब यीशु न उन्ख जवर बुलाय क उन्को सी कह्यो, "तुम जानय भी हय कि जो हेथेंन को शासक समझ्यो जावय हंय, हि उन पर शासन करय हंय; अऊर उन्म जो बड़ो हंय, उन पर अधिकार जतावय हंय, 43 ✝१०:४३ मत्ती २३:११; मरकुस ९:३५; लूका २२:२६पर तुम म सी असो नहाय, जो कोयी तुम म सी बड़ो होनो चाहवय हय, ऊ सब को सेवक बने; 44 अऊर जो कोयी तुम म मुख्य बननो चाहवय हय, ऊ सब को सेवक बने। 45 कहालीकि मय आदमी को बेटा येकोलायी नहीं आयो कि अपनी सेवा करावन, बल्की दूसरों कि सेवा करन, अऊर लोगों को पापों की कीमत चुकावन लायी अपनो जीवन देन आयो होतो।"

अन्धो बरतिमाई की आंखी ठीक होनो

46 हि यरीहो नगर म पहुंच्यो, अऊर जब ऊ अऊर ओको चेलावों, अऊर एक बड़ी भीड़ यरीहो सी निकलत होती, त बरतिमाई नाम को एक अन्धा भिखारी, जो तिमाई को बेटा होतो, सड़क को किनार बैठ्यो होतो। 47 जब ऊ सुन्यो कि यो नासरत निवासी यीशु हय, त पुकार पुकार क कहन लग्यो, "हे यीशु! दाऊद को बेटा! मोरो पर दया करो!"

48 बहुत सो न डाट क कह्यो कि ऊ चुप रहे। पर ऊ अऊर भी पुकारन लग्यो, "हे दाऊद की सन्तान, मोरो पर दया कर!"

49 तब यीशु न रुक क कह्यो, "ओख बुलाव।"

अऊर लोगों न ऊ अन्धा ख बुलाय क ओको सी कह्यो, "हिम्मत रख! उठ! ऊ तोख बुलावय हय।"

50 ऊ अपनो कपड़ा फेक क उछल पड़यो, अऊर यीशु को जवर आयो।

51 येको पर यीशु न ओको सी कह्यो, "तय का चाहवय हय कि मय तोरो लायी करू?"

अन्धा न ओको सी कह्यो, "हे गुरु, यो कि मय देखन लगू।"

52 यीशु न ओको सी कह्यो, "चली जा, तोरो विश्वास न तोख चंगो करयो हय।"

अऊर ऊ तुरतच देखन लग्यो, अऊर रस्ता म ओको पीछू चली गयो।