Mateus 17

यीशु को रूप को बदलाव

1 छे दिन को बाद यीशु न पतरस अऊर याकूब अऊर ओको भाऊ यूहन्ना ख अपनो संग ले क उन्ख एकान्त म कोयी ऊचो पहाड़ी पर ले गयो। 2 उत उन्को आगु ओको रूप को बदलाव भयो अऊर ओको मुंह सूरज को जसो चमक्यो अऊर ओको कपड़ा प्रकाश को जसो उजलो भय गयो। 3 अऊर मूसा अऊर एलिय्याह ओको संग बाते करतो हुयो उन्ख दिखायी दियो।

4 येको पर पतरस न यीशु सी कह्यो, "हे प्रभु, हमरो इत रहनो अच्छो हय। यदि तोरी इच्छा हय त मय इत तीन मण्डा बनाऊं; एक तोरो लायी, एक मूसा लायी, अऊर एक एलिय्याह लायी।" 5 ✝१७:५ मत्ती ३:१७; १२:१८; मरकुस १:११; लूका ३:२२२ पतरस १:१७,१८ऊ बोलतच रह्यो होतो कि एक उज्वल बादर न उन्ख छाय लियो, अऊर ऊ बादर म सी यो आवाज निकली: "यो मोरो प्रिय बेटा आय, जेकोसी मय बहुत खुश हय: येकी सुनो।" 6 जब चेलावों न यो सुन्यो त हि मुंह को बल गिरयो अऊर बहुत डर गयो। 7 यीशु न जवर आय क उन्ख छूयो, अऊर कह्यो, "उठो, डरो मत।" 8 तब उन्न ऊपर देख्यो अऊर यीशु ख छोड़ अऊर कोयी ख नहीं देख्यो।

9 जब हि पहाड़ी सी उतर रह्यो होतो तब यीशु न उन्ख यो आज्ञा दियो, "जब तक आदमी को बेटा मरयो हुयो म सी जीन्दो नहीं होवय, तब तक जो कुछ तुम न देख्यो हय कोयी सी मत कहजो।" 10 येको पर ओको चेलावों न ओको सी पुच्छ्यो, "फिर धर्मशास्त्री कहाली कह्य हंय कि एलिय्याह को पहिलो आवनो जरूरी हय?" 11 ओन उत्तर दियो, "एलिय्याह जरूर आयेंन," अऊर सब कुछ सुधारेंन। 12 ✝१७:१२ मत्ती ११:१४पर मय तुम सी कहू हय कि एलिय्याह आय गयो हय, अऊर लोगों न ओख नहीं जान्यो; पर जसो उन्न चाह्यो वसोच ओको संग करयो। वसोच आदमी को बेटा भी उन्को हाथ सी दु:ख उठायेंन। 13 तब चेलावों न समझ्यो कि ओन हमरो सी यूहन्ना बपतिस्मा देन वालो को बारे म कह्यो होतो।

मिर्गी की दुष्ट आत्मा सी पीड़ित बच्चा ख चंगायी

14 जब हि भीड़ को जवर पहुंच्यो, त एक आदमी यीशु को जवर आयो, अऊर ओको आगु घुटना टेक क कहन लग्यो, 15 "हे प्रभु, मोरो बेटा पर दया कर! कहालीकि ओख मिर्गी आवय हय, अऊर ऊ बहुत दु:ख उठावय हय; अऊर बार-बार कभी आगी अऊर कभी पानी म गिर पड़य हय। 16 मय ओख तोरो चेलावों को जवर लायो होतो, पर हि ओख चंगो नहीं कर सक्यो।"

17 यीशु न उत्तर दियो, "हे अविश्वासी अऊर जिद्दी लोगों, मय कब तक तुम्हरो संग रहूं? मय कब तक तुम्हरी सहूं? ओख इत मोरो जवर लावो।" 18 तब यीशु न दुष्ट आत्मा ख डाट्यो, अऊर वा ओको म सी निकल गयी; अऊर बेटा उच घड़ी चंगो भय गयो।

19 तब चेलावों न एकान्त म यीशु को जवर आय क कह्यो, "हम दुष्ट आत्मा कहाली नहीं निकाल सक्यो?"

20 ✝ १७:२० मत्ती २१:२१; मरकुस ११:२३; १ कुरिन्थियों १३:२ ओन उन्को सी कह्यो, "अपनो विश्वास की कमी को वजह सी, कहालीकि मय तुम सी सच कहू हंय, यदि तुम्हरो विश्वास राई को दाना को बराबर भी हय, त यो पहाड़ी सी कहजो, ‘इत सी सरक क उत चली जा,’ त ऊ चली जायेंन; अऊर कोयी बात तुम्हरो लायी असम्भव नहीं होयेंन। 21 पर यो जाति प्रार्थना अऊर उपवास को अलावा अऊर कोयी उपाय सी नहीं निकलय।"*१७:२१ यो वचन हस्तलेखों म नहीं पायो जावय

अपनो मरनो यां पुनरुत्थान की भविष्यवानी यीशु को द्वारा

22 जब हि गलील क्षेत्र म होतो, त यीशु न उन्को सी कह्यो, "आदमी को बेटा आदमियों को हाथ म पकड़ायो जायेंन; 23 हि ओख मार डालेंन, अऊर ऊ तीसरो दिन जीन्दो होयेंन।" यो बात पर चेला बहुत उदास भयो।

मन्दिर को कर

24 जब हि कफरनहूम पहुंच्यो, त मन्दिर को कर लेनवालो न पतरस को जवर आय क पुच्छ्यो, "का तुम्हरो गुरु मन्दिर को कर नहीं देवय?"

25 ओन कह्यो, "हव, देवय हय।"

जब ऊ घर म आयो, त यीशु न पहिले ओको सी पुच्छ्यो, "शिमोन, तय का सोचय हय? धरती को राजा चुंगी यां कर कौन्को सी लेवय हंय, अपनो बेटा सी यां परायो सी?"

26 पतरस न ओको सी कह्यो, "परायो सी।"

यीशु न ओको सी कह्यो, "त बेटा कर देनो सी बच गयो। 27 पर असो नहीं होय कि हम उन्को लायी ठोकर को वजह बने, तय झील को किनार जाय क गरी डाल, अऊर जो मच्छी पहिले निकले, ओख ले; अऊर ओको मुंह खोलन पर तोख एक सिक्का मिलेंन, ओख ले क मोरो अऊर अपनो बदला को उन्ख दे देजो।"