1 Alaye, e wusə̂ nə də ə̂tə̂ e ə pa kə na ä mâ ndə e, sə sə tə ambanə ne. 2 Mata ə̂në e wûsə̂ nə gâ ye kɔ, ä wû əyo, azü gû ä mâ Flipə, bale, Ndjapä mbrə̂ â ä gbɔ̂gbɔ tə̂ ä ndə kə mʉ Ə̂rɔ̂ Əpʉ nə̂ Ndjapä kə e lə aawlra ə̂në ə rô pâ nə gâ ye kɔ. 3 Bale, kə mʉ əpʉ nə̂ ä nə kə azü kâ kâ gâ pâ əpʉ əterə wala əmbrʉ əpʉ wala əpʉ kə frɔ ətshe ne, 4 bale, a yisə̂ əpʉ nə mata ə̂në Ndjapä yində nə, mbrə ə̂në tshə trâ ä, ä lî gâ ye â tshə zâ kosəra kə mʉ Ə̂rɔ̂ Əpʉ nə gâ lə kəna ä kɔ. Rəkɔ ä pa pra äwä ndə kə pa ä za ə̂rû gâ tə̂ lɔsu azü ne, bale ä za ə̂rû gâ tə̂ lɔsu Ndjapä ə̂në tshə tra lɔsu azü kɔ. 5 Mata ə̂në e wûsə̂ nə gâ ye kɔ, alɔ bale ä pa ə̈bə̈ əpʉ pa ndə kə pa ä frɔ ə̈bə̈ əzü bale ne; alɔ bale ä pa əpʉ pa ndə kə pa ä sɔtə̂ ərə mandâ kə yisə̂ Ə̂rɔ̂ Əpʉ nə bale ne, Ndjapä wusə̂ nə. 6 Ä prâ äwä prâ ndə kə pa azü mbe ä wala e mbe ä wala alabə̈ azü kpî mbe ä ne, 7 bale, tə azü-awla nə̂ Kristə, ä lî kəmə ndə kə pa ä za ama kə e də awlra ndə kə mbrə ərə. Bale, ä mbrə̂ ərə mbrə̂ də awlra lə takpa tə̂ e ne, ä mbrə̂ ərə mata ə̂në əyï aneshe ə ga ndə əndje tə ə̂rɔ̂nə kɔ. 8 Ə̂në ä yində e ə rô pâ nə gâ ye kɔ, ä yî yîndə kə yisə̂ kʉtə̂ Ə̂rɔ̂ Əpʉ nə̂ Ndjapä nə kə e ne, bale, ä kâ ndje tə̂ ä mbrə e, mbrə ə̂në əpʉ e sə tə̂ lɔsu ä ə rô pâ nə gâ ye! 9 Alaye, e lï tshelə e tə̂ kosəra ə̂në ä mbrə̂ də əyo ə̂në ä wû kɔ: sɔ də tsheləbu sɔ də alɔ ä mbrə̂ kosəra ndə kə pa ä sə̂ sə̂ tə kongbɔ gâ pâ ə̈bə̈ əzü bale lə takpa tə̂ e ne, â ä yîsə̂ Ə̂rɔ̂ Əpʉ nə̂ Ndjapä kə e.

10 Ərə ə̂në ä mbrə̂, e wûsə̂ nə â Ndjapä ndje wûsə̂ nə gâ ye: lə takpa tə̂ e ə̂në e zâ lɔsu e kə Ndjapä gâ ye kɔ, kə mbrə tə̂ ä sə̂ mvo ə sə̂ tə ə̂rɔ̂nə â əpʉ bale sə̂ sə̂ lə kumu ä ne. 11 E wusə̂ nə ndje ə pa ä sə̂, mbrə əzü bale bale lə takpa tə̂ e, tə ərə ə̂në abä əgblə sə tə nə mbrə aləvu nə kɔ. 12 Ä pâ əpʉ kə e, ä gbɔ̂gbɔ lɔsu e, ä pâ əpʉ kə e ngbatshe ndə kə pa e mbrə ərə ə̂në tshelə Ndjapä yində nə kɔ, ətshə ə̂në tshə ê e mbrə Əgɔngerə nə̂ ye, ndje mbrə ə̂yî ye kɔ.

13 Âdârə ə̂në ä sə kə za mərshe kə Ndjapä alɔnɔ̂, mbrə ə̂në alɔ ə̂në e yîndə Əpʉ Ndjapä nə ə̂në ä yîsə̂ nə â e djî kɔ, e yîndə əpʉ nə yî mata əpʉ nə̂ azü ne, bale, e yîndə nə mata djatra Əpʉ Ndjapä, ə̂në ə sə kə mbrə ərə tə̂ lɔsu e, e-e ə̂në e yində əpʉ nə kɔ. 14 Rəkɔ, alaye, kə mbrə tə̂ e dô tə̂ ye gâ ye mata ənə̂ azü Alaglizə nə̂ Ndjapä lə əgɔ Jude, ə̂në əndje zâ lɔsu əndje kə Jezu Kristə gâ ye kɔ. E-e ndje, e wû əyo lə kəna azü əgɔ nə̂ e də ə̂tə̂ e mata ə̂në azü Laglizə lə ashɔ Jude nə wû əyo lə kəna Ajuwufu kɔ gâ ye. 15 Ajuwufu nə kə wô Âgbɔ̂ Əyïngerə Jezu gâ ndə aawopandəma Ndjapä â gî əyo tə̂ ä kɔ. Kə mbrə tə̂ əndje fʉ fʉ lə ala Ndjapä bale ne â əndje sə tə alayïəpʉ nə̂ azü nɔ̂. 16 Əndje kânga äwä tə̂ ä ndə kə pa ä pa əpʉ pa kə azü ə̂në əndje sə sə tə Ajuwufu ne kɔ, kanika Ndjapä tshɔ əndje tshɔ lə kuzu ne. Rəkɔ, əndje ka katə̂ kə mbrə anyaka gâ pâ nə gâ pâ nə ne. Bale, əkɔ nə̂ Ndjapä tê gâ pâ əndje dââ gâ ye.

17 Ənə̂ ä, alaye, ə̂në a də a-e krû tshelə əzə̂ teashe gâ ye â wû tə̂ əzə̂ wû ne kɔ, bale, lɔsu ä sə gâ pâ e. Əgo kə wu e kwatə̂-ä mi ä tə bandanə â ä sə kə mbrə nɔ̂ ndə kə pa ä na ə wu e. 18 Ä yî ndje ndə kə na mâ ndə e je, bale əmə Palɔ, mə prâ äwä ndə kə na mâ je äwä bale wala äwä bishi, bale Sataa kânga äwä tə̂ əmə gâ ye. 19 Rəkɔ, alɔ kə gu Âgbɔ̂ Əyïngerə Jezu, əde də̂ ä sə kə za lɔsu ä gâ pâ ye, â za ə̂rû gâ tə̂ lɔsu ä, â sə tə ərə ə̂në ə yisə̂ nə ə pa ä sɔ la bənde gâ ye? Ə də̂ e də̂ ne a? 20 Ayî, e-e kə sə tə ərə ə̂në ä da əkro ä tə̂ nə â tshelə ä ə mɔ tə̂ nə kɔ!