1 Əmə, âgbɔ̂ əzü, mə ta ngrowô səye kə Âgbɔ̂ Yashe ə̂në Ndjapä kê ətshə gâ ye kɔ, ndje kə aneshe nə̂ ye* ə̂në mə yində əndje tə djatra əpʉ kɔ. Ə də̂ kʉtə̂ əmə də̂ kə yində əndje kɔ ne, bale azü nɔ̂ ə̂në əndje wusə̂ djatra əpʉ kɔ yində əndje ndje, 2 mbrə djatra əpʉ nə ə̂në ə sə tə̂ lɔsu əzə̂, â ə̂në ə daka pə lə takpa tə̂ əzə̂ piii je kɔ.

3 Abä də Ndjapä gâ ndə Jezu Kristə, tə Ɨrɨ Abä əzə̂ nə, ə mbrə ə̂rɔ̂tə̂ əndje kə əzə̂ ə wu əyo əzə̂ ə za blatshe kə əzə̂ je lə kə sə əzə̂ lə djatra əpʉ nə gâ ndə kə yi tə̂ əzə̂.

4 Tshelə əmə sə də âgbɔ̂ ə̂rû ə̂në mə wû alabə̈ aneshe nə̂ zə ə̂në əndje sə kə mbrə ərə tə̂ äwä djatra əpʉ, Lïndə̂ əpʉ ə̂në Abä zâ ama də nə kə əzə̂ gâ ye kɔ. 5 Â ə̂në a ləye, Âgbɔ̂ Yashe, ərə ə̂në mə yu tshuku nə kə əbə kə də̂ a yi tə̂ əzə̂ lə takpa tə̂ əzə̂. Əpʉ ə̂në mə ta ngrowô də nə kə əbə kɔ sə sə tə tafa âgbɔ̂ əpʉ ne, bale ə sə kʉ tə ənə̂ sə̂ ə̂në a sɔ̂tə̂ nə pə tə̂ ama nə gâ ye kɔ. 6 Â kə yi tə̂ nə, kə də̂ äwä ndə kə pa əzü mbrə tə̂ ye ə lï də aəpʉ ə̂në Ndjapä zâ ama də nə gâ ye kɔ. Â âgbɔ̂ əpʉ nə ə̂në e lï ndə kə pa e mbrə tə̂ e Lïndə̂ nə kɔ kə sə̂, mata ə̂në e djî əpʉ nə pə tə̂ ama nə gâ ye kɔ.

7 Alayïəterə ngbatshe zâ tshepashɔ nɔ̂ na na ye gâ ye, ə̂në əndje yi yində kə wusə̂ nə ə pa Jezu Kristə dô tə̂ ye ngâ tə̂ əzü gâ ye kɔ ne. Äwä kə yerɔ əyïəterə də əyïkowɔ nə̂ Kristə kɔ kə sə̂. 8 Rəkɔ, e bäta tə̂ e, kanika tshe mandâ kosəra ə̂në a mbrə̂ gâ ye kɔ ro ro lə kəna e ne, bale ka e sɔtə̂ aərə nɔ̂ mandâ kosəra nə.

9 Əzü nɔ̂ ə̂në tshə tɔ tɔ popo kə yisə̂ ərə gâ pâ əpʉ Kristə nə ne â za ə̈bə̈ əpʉ kpî gâ pâ nə, tshə wə̂ra tə̂ ye tə̂ Ndjapä gâ ye. Əzü ə̂në tshə daka pə tə̂ äwä kə yisə̂ ərə səkɔ, tshə tɔ̂ popo Abä, ndje popo Ɨrɨ nə gâ ye. 10 Kədə ə̈bə̈ əzü kə na gâ tə̂ e, â na na də əpʉ kə yisə̂ ərə səkɔ ne, e zä ətshə zä gâ lə anda nə̂ e ne ə zä wanda za kə ətshə ne. 11 Mbrə ə̂në əzü ə̂në tshə za wanda kə ətshə, tshə te gâ ndə ye lə kə mbrə aəmbrʉ aərə ə̂në tshə sə kə mbrə nə kɔ.

12 Mə sə də aəpʉ ngbatshe ndə kə pa nə kə e lə ngrowô nə, bale mə sə sə də əgo ndə kə ta ə ta də ayɔ ngrowô gâ lə fraka nə ne. Bale, mə wusə̂ nə ə pa mə sə kə na ndə kə wu e, ə pa əpʉ kə e kpə ətshi e, kanika tshelə əzə̂ mɔ tə bandanə.

13 Aneshe nə̂ aye* zə, ətshə ə̂në Ndjapä kê ətshə gâ ye kɔ, əndje bla əbə.