1 Leme-e, aafrɔ aawopandəma Ndjapä sə̂ je lə takpa tə̂ azü əgɔ Isərayalə. Ə sə äwä bale ndje rə, aəmbrʉ aawoyisə̂ ərə sə kə sə je lə takpa tə̂ e, ə̂në əndje sə kə li də aəpʉ əterə lə angbanə gâ lə kə yisə̂ ərə nə ə̂në ə na də azü gâ tə̂ äwä kuzu kɔ. Əndje sə kə na ʉrrr ə wəra tə̂ əndje tə̂ Makɔndji nə ə̂në tshə tshɔ̂ əndje lə kuzu gâ ye kɔ. Rəkɔ, əndje sə kə e ərə əyo gâ pâ əndje ə̂në ə sə kə wo əndje katshä. 2 Azü ngbatshe sə kə za äwä əndje də ərə kene ə̂në əndje mbrə kɔ, â mbrə əndje, alabə̈ azü sə kə pa tə̂ äwä djatra əpʉ nə. 3 Mbrə əgo ngendja, əndje sə kə frɔ e də aəpʉ tshelə kumu əndje ndə kə zɨ e. Bale, ənə̂ əndje, əpʉ ngbanga nə̂ əndje âfɔ kerə gâ ye, â ərə kə liwu əndje ndô trö gâ ye.

4 Mbrə ə̂në Ndjapä kâtə̂ atrawaya nə̂ Ndjapä ə̂në əndje mâ nyaka leme-e kɔ kâ tə ambanə ne, bale tshə kô əndje ə gʉ̂ əndje gâ ə̂sə̂ əyo ə̂në əndje î əndje də aə̂wû kowɔ lə əbutshe ə bâta əndje gâ ye kɔ mbrə alɔ ngbanga kɔ. 5 Tshə kâtə̂ tshepashɔ tshe leme-e kâ tə ambanə ne, alɔ ə̂në tshə wlâ ə̂ngû gâ pâ ashɔ nə̂ azü ə̂në əndje wə̂ra tə̂ əndje tə̂ ye gâ ye kɔ. Bale, tshə bâta azü mindû amanə vəta, ə̂në Nɔwe sə̂ lə takpa tə əndje, tə awomʉ əpʉ kə mbrə ərə də äwänə kə azü kɔ.*2.5 Wu Vɔtə̂ 6.1–7.24. 6 Tshə wâ ngbanga ndje gâ pâ agala Sɔdɔmə də Gɔmɔrə ə lîwu əndje ə mbrə̂ tshemandâ nə tə mvrowo, ə yîsə̂ nə kə azü ə̂në əndje wə̂ra tə̂ əndje tə̂ ye kɔ ə pa marä tə̂ ərə ə̂në ə ka mbrə əndje kɔ kə sə̂.*2.6 Wu Vɔtə̂ 19.24. 7 Bale, tshə djɔ̂ Lɔtə, əzü ə̂në kə mbrə ərə nə̂ ye sə də äwänə kɔ; lɔsu Lɔtə nə sə̂ alɔnɔ̂ lə əyo mbrə kə mbrə ərə kene nə̂ aəmbrʉ azü tshelə agala səkɔ. 8 Mbrə ə̂në ə̂rɔ̂ əzü səkɔ ə̂në tshə mbrə̂ əgɔ lə takpa tə̂ əndje kɔ, alɔnɔ̂, lɔsu ye nə̂ ə̂rɔ̂ əzü nə sə̂ sə̂ kpirə̂ ne mbrə əmbrʉ ərə ə̂në tshə sə̂ kə wu nə kɔ də əmbrʉ əpʉ ə̂në tshə sə̂ kə dji nə kɔ. 9 Rəkɔ, ə yisə̂ nə ə pa Âgbɔ̂ Əyïngerə wusə̂ äwä kə djɔ azü ə̂në əndje tɔ popo ətshə kɔ lə ərə kə tra əndje â ko aawombrə əmbrʉ ərə tʉ ndə kə pa tshə wa əndje tə̂ alɔ ngbanga. 10 Tshə sə kə wa dîrî dîrî azü ə̂në, tə̂ äwä əgo ərə kene, əndje sə kə kpe mandâ aəgo lɔsu əndje ə wu ngerə nə̂ Ndjapä tə ə̈bə̈ amba ərə lə ala əndje kɔ.

Aafrɔ aawoyisə̂ ərə səkɔ sə tə alayïwuma də aawoda əkro əndje â awa kə gu ayirə̂ ə̂yî tshelafɔ mbrə əndje mbrə ne. 11 Kandää, atrawaya nə̂ Ndjapä ə̂në əndje rô aafrɔ aawoyisə̂ ərə səkɔ də awlra də əpʉ ngerə gâ ye kɔ, əndje za əpʉ za gâ lə kumu ayirə̂ səkɔ ə gu əndje gu ətshi Âgbɔ̂ Əyïngerə nə ne. 12 Bale, azü səkɔ, əndje mbrə tə̂ əndje mata aagia ə̂në əndje wusə̂ ərə wu bale ne kɔ, ə̂në əndje zû əndje kʉ ndə kə pa azü tegbɔ əndje ə ko əndje ə ko ə wo əndje kɔ. Əndje sə kə gu ə̂gû tə̂ ərə ə̂në əndje wusə̂ âdâ nə wu ne kɔ. Əndje sə kə tshu mata aagia nə, 13 əndje sə kə sɔtə̂ əmbrʉ ərə mandâ əmbrʉ ərə nə ə̂në əndje mbrə̂ gâ ye kɔ. Tshelə əndje mɔ ə mɔ ndə kə mbrə ərə kene də əngbiɔ alɔ. Alɔ ə̂në e də aəndje sə kə mbrə sandaga, tshelə əndje mɔ ə mɔ ndə kə pa əndje frɔ e â kə sə əndje lə takpa tə̂ e sə kə dja tshekotə̂ e ə sə kə ndɨ əɨrɨ e. 14 Tshelə ala əndje sə kʉ də əgo kə pra alawɔ azü â tshelə əndje su su tə̂ kə mbrə nyaka ne, əndje sə kə frɔ azü ə̂në lɔsu əndje gbɔ gbɔ ne kɔ. Lɔsu əndje sə kʉ gâ pâ əgo ngendja, əndje sə tə azü ə̂në əndje drâ əndje gâ ye. 15 Əndje tshî ə̂rɔ̂ äwä tʉ gâ ye ə djîngli gâ ye â zâ də̂ äwä ə̂në Balamə, ɨrɨ Bɔsɔrə*2.15 Wu Kumu 22.2-35., zâ gâ ye kɔ, ə̂në tshə mâ əgo kə sɔtə̂ ngendja mandâ kə ma əmbrʉ ərə kɔ. 16 Bale, əndje ngâ kə ətshə mbrə kə dji əpʉ dji tə̂ ye ne: ə̈bə̈ kunda, tə agia ə̂në tshə pa əpʉ pa ne kɔ, pâ əpʉ də tshema əzü â kânga äwä tə̂ ərə yïrə̈ ə̂në awopandəma Ndjapä səkɔ yîndə kə mbrə nə kɔ.

17 Aafrɔ aawoyisə̂ ərə səkɔ sə mata kumungû ə̂në ə̂ngû sə sə tə̂ nə ne kɔ, mata dandutshe lafɔ ə̂në âgbɔ̂ əyi ə za ə ro də nə kɔ. Ndjapä gâmba ətshe mbrə əndje lə əbutshe ə̂në ə bu shiwu kɔ gâ ye. 18 Də əgbro aəpʉ tshelə ama əndje ə̂në ə tɔ tɔ gâ tə̂ ə̈bə̈ ərə ne kɔ, tə̂ äwä aəgo ərə kene lɔsu, əndje sə kə frɔ azü ə̂në əndje tɔ̂ katshä katshä səye lə takpa tə̂ azü ə̂në əndje djîngli äwä gâ ye lə kə mbrə tə̂ əndje kɔ. 19 Əndje sə kə pa kə azü nə ə pa alane sə kə djɔ əndje lə kanga, kandää əndje də ə̂tə̂ əndje, əndje sə tə akanga aəgo aərə ə̂në ə sə kə ndɨ əndje kɔ, mbrə ə̂në əzü bale bale sə tə kanga ərə ə̂në əgo nə rô pâ ye gâ ye kɔ. 20 Mbrə ə̂në, kədə əndje tɔ̂ lə aərə kene tshepashɔ səye gâ ye ə̂në əndje wûsə̂ Jezu Kristə, Âgbɔ̂ Əyïngerə nə̂ əzə̂ də Awoshe əzə̂ gâ ye kɔ, bale kədə əndje kwatəndje ə katə̂ äwä kə aərə kene səkɔ â ə ko əndje â aəgo nə rô pâ əndje gâ ye, kə sə əndje sə kə sə tə əmbrʉ nə ə ro ənə̂ angbʉlînə. 21 Mbrə ə̂në ə sə̂ kəmə tə ə̂rɔ̂nə ndə kə pa əndje wusə̂ äwä kə mbrə ərə də äwänə wu ne, ə ro ndə kə pa əndje wûsə̂ nə gâ ye ə do tshepa əndje gbo aəpʉ tshelə âgbɔ̂ əpʉ nə̂ Ndjapä ə̂në əndje yîsə̂ nə kə əndje gâ ye kɔ. 22 Ərə ə̂në ə wûtu gâ tə̂ əndje kɔ, ə sə tə djatra əpʉ ə̂në dame pa: «Yavrɔ gû kwatə̂ye ndə ərə ə̂në tshə ndjâ gâ ye kɔ»*2.22 Wu Dame 26.11. â «kɔsɔ ə̂në əndje yûtu ətshə katshä katshä səye kɔ na kwatə̂ye ə wuru tə̂ ye lə kpata.»