1 Alaye əmə ə̂në mə yində e wââ kɔ, bishi ngrowô də̂ mə ta kə e kɔ. Lə angrowô nə bishi nɔ̂, mə sə kə pa ndə əpʉ aərə ə̂në e wûsə̂ nə gâ ye kɔ ndə kə pa e wusə̂ kə tegbɔ kumu e də äwänə. 2 E lï tshelə e gâ pâ ndəma aəpʉ ə̂në aawopandəma Ndjapä ə̂në əndje sə kpî kɔ pâ ətshinə gâ ye kɔ, ndje, gâ pâ əpʉ tshelə âgbɔ̂ əpʉ nə̂ Âgbɔ̂ Əyïngerə də Awoshe azü, ə̂në azü-awla nə̂ e yîsə̂ nə kə e gâ ye kɔ. 3 E wüsə̂ nə angbʉlînə ə pa lə bale aəlo tshepashɔ, alayïamɔ sə kə yi kumu əndje də aəpʉ kə mɔ ətshe, ə̂në əndje sə kə mbrə aərə kʉ tə̂ äwä aəgo lɔsu əndje də ə̂tə̂ əndje kɔ, â sə kə mɔ e 4 ə pa: «Tshelə ndəma əpʉ kə gu ətshə nə sə kotâ a? Mbrə ə̂në leme-e kerə ə̂në alabä* tshû gâ ye kɔ, aərə nɔ̂ daka pə kpə mandânə mata ə̂në tshepashɔ vɔ̂tə̂ nə kɔ.» 5 Bale, əpʉ tshelafɔ ə̂në Ndjapä mâ leme-e kerə kɔ, də ə̂në ashɔ wûtu lə ə̂ngû â kâ gâ ə̂grû ə̂ngû nə tə̂ äwä əpʉ ama Ndjapä kɔ, ə̂sə̂ nə rô əndje tə gəwlanga gâ ye. 6 Kʉ tə̂ äwä ə̂ngû nə ndje, tshepashɔ tshe leme-e lîwu, ə̂në ə̂ngû nə sû ə môro nɔ̂ gâ ye kɔ. 7 Bale, tə̂ äwä kʉtə̂ əpʉ ama Ndjapä nə bale də̂ tshə kô tshelafɔ də ashɔ tshe kpəsəye tʉ mbrə əwo, tə̂ əlo ngbanga də əlo kə liwu azü kə mbrə aəmbrʉ aərə kɔ.

8 Alaye əmə ə̂në mə yîndə e ngbatshe kɔ, ə̈bə̈ əpʉ sə je ə̂në ə̂sə̂ nə lï lï ndə kə pa ə djerə e ne: lə ala Əyïlingû, əlo bale sə mata ə̂ngû sake bale (1 000) â ə̂ngû sake bale (1 000) sə mata əlo bale.* 9 Ərə ə̂në Âgbɔ̂ Əyïngerə zâ ama də əpʉ kə mbrə nə gâ ye kɔ, əndʉ nə sə sə kə dɨ ə dɨ â tshə mbrə ndəma nə ne, mata ə̂në alabə̈ azü wu ənə̂ əndje ə pa əndʉ nə dɨ̂ ga ye kɔ. Bale, tshə daka pə kə ru tshelə ye tə̂ e, mbrə ə̂në tshə yində nə yi ə pa ə̈bə̈ əzü tshu kuzu ne, bale tshə yində nə ə pa azü nɔ̂ tɔ gâ tə̂ äwä kə tshi äwä angbrɔ kə mbrə tə̂ əndje tʉ.

10 Bale, əlo kə gu Âgbɔ̂ Əyïngerə sə kə sə mata alɔ kə na əyïangba. Tə̂ əlo nə səkɔ, tshelafɔ sə kə ro nə də əsərɨ nə tə âgbɔ̂, aambrepe sə kə ju nə â tshelə əndje sə kə gba nə â ashɔ də aərə ə̂në azü mbrə̂ pâ ashɔ nɔ̂ kɔ sə kə ro nə*. 11 Rəkɔ ə̂në aərə səkɔ nɔ̂ sə kə ro nə ə ro kɔ, kə sə e lï ndə kə sə atâ a? E mbrə̈ tə̂ e tə azü ə̂në e sə kpî ə tɔ̂ popo Ndjapä gâ ye kɔ 12 ka ə sə kə ka mbrə kə wutu əlo nə̂ Ndjapä nə ə sə kə dra əlo nə ə dra. Tə̂ əlo nə, əwo sə kə ju tshelafɔ â sə kə gba tshelə nə nɔ̂, aambrepe sə kə ju nə â tshelə əndje ə gba nɔ̂ je. 13 Bale, Lïndə̂ tshelə ndəma Ndjapä nə, a sə kə ka mbrə tafa tshelafɔ də tafa ashɔ ə̂në kə mbrə ərə də äwänə sə kə sə je pâ nə kɔ.*

14 Âdârə ə̂në, alaye əmə ə̂në mə yîndə e ngbatshe kɔ, lə kə ka mbrə əlo səkɔ, e mbrə̈ nɔ̂ ndə kə pa tshə gu gu ə sɔtə̂ e də ə̈bə̈ əmbrʉ ərə tə̂ e wala də ə̈bə̈ əpʉ lə kumu e bale ne, bale tshə sɔtə̂ e lə blatshe. 15 E wü ə pa kədə Âgbɔ̂ Əyïngerə nə̂ əzə̂ nə kə kânga tshelə ye ndə kə ka ə ka ʉrrr, âdâ nə kə də̂ kə pa e tshɔ lə kuzu, mata ə̂në aye əzə̂ də Palɔ, ə̂në a yində ye ngbatshe kɔ, tâ ndje ngrowô də əpʉ nə kə e gâ ye, də kə wusə̂ ərə ə̂në Ndjapä zâ kə ətshə kɔ. 16 Əpʉ ə̂në tshə sə kə pa nə lə angrowô nɔ̂ ə̂në tshə tâ kɔ gâ pâ aəpʉ səkɔ kə sə̂. Alabə̈ aəpʉ nə lə angrowô nə gbɔ ə gbɔ ndə kə pa əzü dji tshelə nə, â azü ə̂në əndje wusə̂ ərə wu ə gbɔ gbɔ tə̂ äwä Əpʉ Ndjapä ne kɔ, sə kə do tshelə âdâ aəpʉ nə, mata ə̂në əndje sə kə mbrə ndje tə̂ aə̂dû aəpʉ lə Fraka nə̂ Ndjapä nə kɔ; əndje mbrə rə ndə kə pa əndje liwu äwä sorô əndje də ə̂tə̂ əndje.

17 Ənə̂ e, alaye əmə ə̂në mə yîndə e ngbatshe kɔ, ə̂në e djî əpʉ səye ətshinə gâ ye kɔ, ala e gbɔ̈, kanika aəmbrʉ azü nə ə̂në əndje djîngli äwä gâ ye kɔ frɔ e frɔ ndə kə pa e tshi äwä əpʉ lɔsu ə̂në e ka gâ pâ nə nge nge nge kɔ tʉ ne. 18 Bale, e gërə alɔnɔ̂ lə ə̂rɔ̂tə̂ Âgbɔ̂ Əyïngerə nə̂ əzə̂ də Awoshe əzə̂, Jezu Kristə, ndje lə kə yerɔ ətshə kpro. A mbë ətshə kpəsəye ʉrrr piii! Asərəmə!