1 Rəkɔ, əbə, əgblə nə̂ əmə, gbɔ̈gbɔ tə̂ zə lə ə̂rɔ̂tə̂ Ndjapä ə̂në ə sə tə̂ äwä Jezu Kristə kɔ. 2 Â əpʉ ə̂në bə djî lə ama əmə ətshi azü ngbatshe ə̂në əndje sə gâ ngotə̂ nə kɔ, zä gâ lə kəna azü ə̂në əndje lï ndə kə pa bə za lɔsu zə nɔ̂ kə əndje kɔ, ə̂në əndje lï ndə kə pa, əndje ndje, əndje yisə̂ nə kə alabə̈ aata azü kɔ.

3 Wü əyo ndje, mata əmə, tə ə̂rɔ̂ trugu nə̂ Jezu Kristə. 4 Ə̈bə̈ trugu ə̂në tshə sə kə mbrə kosəra trugu nə, tshə sə sə kə za tə̂ ye gâ tə̂ akosəra nə̂ aamba azü ne, kədə tshə yində kə za ə̂rû gâ tə̂ lɔsu komandâ nə̂ ye nə. 5 Â awokpe ärɔ̈ sə sə kə sɔtə̂ kpɔtɔ tshemandâ ärɔ̈ nə ne, kədə tshə kpe ärɔ̈ nə kpe ə lï də äwä kə kpe ärɔ̈ nə ne. 6 Awodjo kəndɨ ə̂në tshə wu əyo tə̂ kosəra, tshə lï ndə kə pa tshə sə tə angbʉlî əzü ndə kə sɔtə̂ aə̂sə̂ ənə̂ ye arəgo kəndɨ nə. 7 Djï tshelə âdâ əpʉ sə̂ ə̂në mə pa kə əbə kɔ; Âgbɔ̂ Əyïngerə ə za kə wusə̂ ərə kə əbə ndə kə pa bə dji tshelə aərə nɔ̂ je.

8 Lï tshelə zə tə̂ Jezu Kristə ə̂në tshə shê lə takpa tə̂ akuzu gâ ye kɔ, ə̂në tshə wûtu lə angwa Davidə, ə lï də Ə̂rɔ̂ Əpʉ ə̂në mə yisə̂ nə kɔ, 9 ə̂në mə sə kə wu əyo mbrə nə kɔ, ʉrrr mə wu əyo ndje lə kânga a pa də ə̈bə̈ awowo əzü kɔ. Bale, Əpʉ Ndjapä nə sə sə lə kânga ne. 10 Âdârə ə̂në mə sə kə ru tshelə əmə lə aərə nɔ̂ mbrə azü ə̂në Ndjapä kê əndje gâ ye kɔ kə sə̂, kanika, əndje ndje, əndje tɔ gâ tə̂ äwä kə she lə kuzu ə̂në ə sə lə Jezu Kristə nə kɔ, ndje gâ tə̂ äwä ə̂yî ə̂në ə sə piii kɔ. 11 Əpʉ səye sə tə djatra əpʉ:

kədə a tshû gâ ye də a-Kristə nə,

a sə ndje tə asorô gâ ndə ye je;

12 kədə a ru ə ru lə aərə,

a mbrə ngerə ndje də aəndje je;

kədə a wəra tə̂ əzə̂ tə̂ ye,

ətshə ndje, tshə wəra tə̂ ye tə̂ əzə̂ je;

13 kədə a tshi äwä əpʉ ama ye tʉ,

ətshə, tshə daka pə kə mbrə tshelə ndəma ye,

mbrə ə̂në tshə lï lï ndə kə pa tshə wəra tə̂ ye də ə̂tə̂ tə̂ ye ne.

14 Ərə ə̂në bə lï ndə kə pa bə pa kanika azü lï tshelə əndje gâ tə̂ nə kɔ kə sə̂, ə zä ama lə ala Ndjapä ndə kə pa əndje katə̂ äwä kəpʉ mbrə tshelə âdâ aəpʉ gâ ye, ə̂në ə tɔ tɔ gâ tə̂ ə̈bə̈ ərə bale ne kɔ, də̂ ne, ə na də azü nə ə̂në əndje sə kə dji nə kɔ gâ tə̂ äwä ə̂në ə sə kə ndɨ əndje. 15 Gbɔ̈ ə gbɔ̈ ndə kə pa bə na ə ka gâ ətshi Ndjapä tə ə̈bə̈ əzü ə̂në tshə yisə̂ nə gashu ə pa əne lï gâ ye kɔ, tə əyïkosəra ə̂në gana sə sə kə ngɔ ətshə mbrə kosəra nə̂ ye ne kɔ, ə̂në tshə sə kə yisə̂ əpʉ gâ pâ djatra əpʉ də äwänə kɔ. 16 Kpë äwä aəpʉ tshelə ama ə̂në ə tɔ tɔ gâ tə̂ ə̈bə̈ ərə bale ne kɔ, ə̂në ə lï lï də əpʉ lɔsu ne kɔ, mbrə ə̂në, azü ə̂në əndje sə kə za tə̂ əndje gâ tə̂ äwä kə pa marä tə̂ aəpʉ səkɔ, əndje sə kə ro ngrʉ̂ gashe alɔnɔ̂ tə̂ Ndjapä. 17 Əpʉ tshelə ama əndje sə kə zɨ əzü mata əku gbadja. Â Himene də Filatə sə lə takpa tə̂ azü səkɔ. 18 Əndje rô ngrʉ̂ tə̂ djatra əpʉ gâ ye, ə̂në əndje sə kə pa əpʉ ə pa akuzu shê gâ ye kɔ, â əndje sə kə gi alabə̈ azü gashe tə̂ äwä əpʉ lɔsu nə kɔ. 19 Kandää, ə̈nü anda nə ə̂në ə sə nge nge nge kɔ, ə̂në Ndjapä nə zâ tɔ kɔ, ə daka pə je, â əndje tâ əpʉ səye gâ pâ nə ə pa: «Âgbɔ̂ Əyïngerə wusə̂ azü ə̂në əndje sə tə azü nə̂ ye kɔ.»* Â kwatəndje ə pa: «Əzü nɔ̂ ə̂në tshə pa əne sə tə ənə̂ Âgbɔ̂ Əyïngerə nə, tshə gï tə̂ ye gashe ngrʉ̂ tə̂ äwä əmbrʉ ərə.» 20 Lə əgerə anda, ə də̂ kʉtə̂ aərə ə̂në əndje mbrə̂ də lɔrə gâ ndə ngendja kɔ də̂ kə sə je ne, bale alabə̈ aərə sə je ndje ə̂në əndje mbrə̂ də ayɔ də ashɔ kɔ. Alabə̈ nə sə mbrə alɔ sandaga â alabə̈ nə sə mbrə aamba kə mbrə aərə alɔnɔ̂. 21 Rəkɔ, kədə ə̈bə̈ əzü kə yutu tshekotə̂ ye mvo tə̂ äwä kə tshi aərə sə̂ ə̂në mə pâ ndə nə kɔ tʉ, tshə sə kə sə tə ə̈bə̈ ərə ə̂në əndje mbrə də kosəra ə̂në ə lʉ ə lʉ kɔ, ə̂në ə sə kpî, ə̂në ə sə tə ə̈bə̈ ə̂rɔ̂ ərə mbrə əyïnga nə kɔ, ə̂në ə sə trö ndə kə pa əndje mbrə də ə̂rɔ̂ kosəra nɔ̂ kɔ.

22 Kpë gashe tə̂ aəmbrʉ aəgo aərə ə̂në ə sə tə̂ lɔsu amɔdɔ kɔ. Grɔ̈ də̂ äwä kə mbrə ərə də äwänə, äwä əpʉ lɔsu, äwä kə yi tə̂, äwä kə sə də blatshe də azü ə̂në əndje sə kə yu Âgbɔ̂ Əyïngerə də lɔsu ə̂në ə sə mvo kɔ. 23 Wə̈ra tə̂ zə tə̂ aəpʉ aashera əndɨ, ə̂në âdâ nə sə sə je ne kɔ, ə wüsə̂ nə ə pa ə sə kə na də akəpʉ lə takpa tə̂ azü. 24 Kandää, əyïkosəra nə̂ Âgbɔ̂ Əyïngerə lï lï ndə kə pa tshə pʉ də azü ne. Bale, tshə sə̈ də amɔ də azü nɔ̂, tshə lï ndə kə yisə̂ ərə kə azü ə känga tshelə ye tə̂ əmbrʉ ərə. 25 Tshə yïsə̂ ə̂rɔ̂ äwä timənə kə azü ə̂në əndje shera əpʉ lə ama ye kɔ, a wusə̂ nə wu ne Ndjapä ə za äwä kə əndje ndə kə pa əndje tshi äwä angbrɔ kə mbrə tə̂ əndje tʉ ə wusə̂ djatra əpʉ je, 26 ndə kə pa kumu əndje na gâ tə̂ nə, əndje tɔ gashu lə gbânda nə̂ djablo ə̂në tshə kânga əndje ndə kə pa əndje mbrə ərə ə̂në tshelə ye yində nə kɔ.