1 Mə za ama kə əbə, lə ala Ndjapä, lə ala Jezu Kristə ə̂në tshə wa ngbanga asorô də akuzu je kɔ, â mbrə alɔ kə gu ətshə də alɔ ngerə nə̂ ye, 2 mʉ̈ Əpʉ Ndjapä kə azü, ə də̂ tə̂ ə̂rɔ̂ alɔ nə wala ə də̂ tə̂ ə̂rɔ̂ alɔ nə də̂ ne o! Mʉ̈ kʉtə̂ nə, yïsə̂ aəmbrʉ aərə nə̂ azü nə kə əndje kpə lə ala əndje, ə ngä kə əndje, ə gbɔ̈gbɔ lɔsu əndje, ə yïsə̂ nə ə pa bə wusə̂ kə kânga lɔsu zə lə kə yisə̂ ərə nə kə əndje. 3 Mbrə ə̂në ə̈bə̈ alɔ sə kə na gu nə ə̂në azü sə sə kə yində nə ndə kə dji djatra kə yisə̂ ərə ne. Bale, Lïndə̂ aəgo lɔsu əndje də ə̂tə̂ əndje, əndje sə kə ko aawoyisə̂ ərə gâ pâ nə gâ pâ nə ndə kə pa əndje na ə pa kʉtə̂ əpʉ ə̂në ə to ə to kɔ lə ətu alane. 4 Əndje sə kə do ətu əndje gashe tə̂ djatra əpʉ nə ndə kə pa əndje dra ətu əndje ə dji andəmaterə. 5 Bale, əbə, bäta kumu zə lə aərə nɔ̂, känga tshelə zə lə aərə əyo, mʉ̈ Ə̂rɔ̂ Əpʉ nə, mbrə̈ kosəra Ndjapä nə̂ zə nə nɔ̂.

6 Mbrə ə̂në, ənə̂ əmə, mə sə trö ndə kə pa ə̈ndjï əmə tu tə ərə kə to əkrɔ gâ ye, â alɔ kə ro əmə lî gâ ye. 7 Mə mbrə̂ âtshɔ̂ awlra gâ ye, mə wûtu gâ tə̂ ama ärɔ̈ ə̂në mə kpe kɔ gâ ye, mə bâta əpʉ lɔsu gâ ye. 8 Mandânə səye, Ndjapä bâta kpɔtɔ ärɔ̈ kə mbrə ərə də äwänə gâ ye mbrə əmə. Âgbɔ̂ Əyïngerə, tə awowa ngbanga də äwänə, ə za kə əmə tə̂ alɔ âgbɔ̂ ngbanga je, â də̂ kʉ kə əmə də̂ ne, bale ndje kə azü nɔ̂ ə̂në əndje sə kə ka mbrə alɔ kə gu ətshə nə də lɔsu əndje nɔ̂ kɔ.

9 Mbrə̈ nɔ̂ ndə kə pa bə na katshä ə te əmə. 10 Mbrə ə̂në Demasə tshî əmə tʉ gâ ye, mbrə əgo aərə tshepashɔ səye, â tshə rô gâ Tesalɔnikə gâ ye. Kresasə rô gâ Galasi gâ ye â Titə rô ndje gâ Daləmasi gâ ye. 11 Luki tshî kə sə ngotə̂ əmə kɔ. Zä Markə, e də ətshə nä, mbrə ə̂në tshə sə kə mbrə ə̂rɔ̂ nə kə əmə tə bandanə lə kosəra Ndjapä nə. 12 Mə wlâ Tishikə mâ Efazə gâ ye. 13 Alɔ ə̂në bə sə kə na nə, nä də əgerə ləba əzɨ ə̂në mə zâ tʉ mâ Trowasə mâ ndə Karəpɔsə kɔ, də afraka, dîrî dîrî afraka ə̂në ə sə də akwa kɔ*.

14 Alegəzandrə, əyïndawo, mbrə̂ əmbrʉ ərə kə əmə ngbatshe. Âgbɔ̂ Əyïngerə ə kirə əndʉ nə kə ətshə ə lï də aərə ə̂në tshə mbrə̂ kɔ je. 15 Əbə ndje, ala zə gbɔ̈ mbrə ətshə, mbrə ə̂në tshə wə̂ra tə̂ ye kprû tə̂ aəpʉ nə̂ ä gâ ye.

16 Tə̂ alɔ angbʉlî kə pa əpʉ lə ngbanga tə̂ əmə, ə̈bə̈ əzü bale nâ nâ gâ ngotə̂ əmə ne, azü nɔ̂ tshî əmə tʉ gâ ye. Ndjapä kätə̂ kə wa ndə nə kə əndje gâ ye. 17 Bale, Âgbɔ̂ Əyïngerə kə sə̂ â sə̂ gâ ngotə̂ əmə â gbɔ̂gbɔ əmə, kanika mə mʉ Ə̂rɔ̂ Əpʉ nɔ̂ kə azü ka azü nɔ̂ ə̂në əndje sə sə tə Ajuwufu ne kɔ, əndje dji. Â Âgbɔ̂ Əyïngerə djɔ̂ əmə lə ama bamara gâ ye. 18 Âgbɔ̂ Əyïngerə sə kə djɔ əmə lə əmbrʉ ərə nɔ̂ ə̂në azü sə kə mbrə nə kɔ â tshɔ əmə lə kuzu mbrə Əgɔngerə tshelafɔ nə̂ ye je. A mbë ətshə də ə̂ngû də ə̂ngû piii! Asərəmə!

19 Blä Prisilə də Akilasə gâ ndə azü tshelə bəngʉ nə̂ Ɔnezifɔrə kə əmə. 20 Erasətə sə pə mâ Kɔratə, â mə tshî Trɔfimə tʉ də rəka mâ Mile. 21 Mbrə̈ nɔ̂ ndə kə pa bə na angbʉlînə ndə kə pa tshekɨ əzɨ lï.

Ebulə də Pudasə də Linusə də Klɔdia gâ ndə alaye nɔ̂ bla əbə.

22 Âgbɔ̂ Əyïngerə sə̈ də əbə! Ə̂rɔ̂tə̂ ye sə̈ də e nɔ̂!