1 Ənə̂ zə, pä kʉtə̂ əpʉ ə̂në ə lï də kə yisə̂ ərə ə̂në ə sə də äwänə kɔ. 2 Pä kə ayawaza koshe ə pa əndje mbrə̈ ərə mbrə̈ kʉ ngbaa ne, ə lʉ̈ tə̂ əndje, ə wüsə̂ kə tegbɔ kumu əndje, ə gbɔ̈ ə gbɔ̈ tə̂ äwä əpʉ lɔsu, tə̂ äwä kə yi tə̂, ndje tə̂ äwä kə ru ə ru lə aərə nɔ̂. 3 Pä ndje kə ayawaza yashe ə pa əndje mbrə̈ tə̂ əndje ə lï də kə mbrə tə̂ azü ə̂në əndje sə kpî mbrə Ndjapä kɔ. Əndje lï lï ndə kə pa əndje pa tə̂ azü, wala ə sə tə aawondju ərə ne; əndje yïsə̂ də̂ ə̂rɔ̂ ərə kə azü, 4 kanika ə yisə̂ äwä kə alamvera ə̂në əndje kô akoshe kɔ ndə kə pa əndje yində aläkɔ̈ əndje də aneshe nə̂ əndje, 5 ə wüsə̂ kə tegbɔ kumu əndje, ə bäta tə̂ əndje kʉ kə aläkɔ̈ əndje, ə mbrə̈ kosəra tshelə aanda nə̂ əndje, ə sə̈ tə aə̂rɔ̂ ayashe, ə djï əpʉ ama aläkɔ̈ əndje, ka azü pa əmbrʉ əpʉ pa gâ tə̂ Əpʉ Ndjapä nə ne.

6 Mʉ̈ ndje əpʉ kə amɔdɔ ə pa əndje wusə̂ kə tegbɔ kumu əndje. 7 Lə aərə nɔ̂, əbə də ə̂tə̂ zə, mbrə̈ aə̂rɔ̂ aərə ndə kə pa əndje wu ə mbrə mandâ zə: yïsə̂ kʉtə̂ ərə ə̂në ə sə də äwänə kɔ kə azü ə lʉ̈ tə̂ zə. 8 Aəpʉ ə̂në bə pa kɔ, ə sə̈ də äwänə ka azü pa əmbrʉ əpʉ pa tə̂ nə ne, kanika gana ngɔ alayïəpʉ nə̂ əzə̂ nə ka əndje sə sə də ə̈bə̈ əmbrʉ əpʉ bale ndə kə pa gâ tə̂ əzə̂ ne.

9 Akanga lï ndə kə pa əndje dji əpʉ ama alayïnga əndje lə aərə nɔ̂, əndje prä äwä ndə kə pa əndje mbrə ərə ə̂në ə fʉ tə̂ əndje kɔ, ə pä ashera pä də aəndje ne, 10 ə kö aərə nə̂ alayïnga əndje nə kö də angbanə ne, bale əndje mbrə̈ aərə tə azü ə̂në alayïnga əndje nə lï ndə kə pa əndje za lɔsu əndje nɔ̂ kə əndje kɔ, kanika, lə aərə nɔ̂, əndje lʉ əpʉ ərə ə̂në Ndjapä, Awoshe əzə̂, ə yisə̂ nə kɔ.

11 Ngâ, ə̂rɔ̂tə̂ Ndjapä, ə̂në ə sə tə̂ äwä kə tshɔ lə kuzu tə̂ nə mbrə azü nɔ̂ kɔ, Ndjapä nə yîsə̂ nə gashu kə azü nɔ̂ gâ ye. 12 Ə sə kə yisə̂ äwä kə əzə̂ ə pa a wəra tə̂ əzə̂ tə̂ äwä əmbrʉ ərə gâ ye, ə wəra tə̂ əzə̂ tə̂ äwä aəgo aərə tshepashɔ səye, ə mbrə tə̂ əzə̂, kpəsəye, tə̂ äwä kə tegbɔ kumu əzə̂ ə mbrə ərə də äwänə ə tɔ popo Ndjapä, 13 kanika ə ka tə̂ ə̂rɔ̂ əlo ərə ə̂në a za lɔsu əzə̂ gâ pâ nə kɔ də alɔ kə wutu ə̂yî âgbɔ̂ Ndjapä nə̂ əzə̂ də Awoshe əzə̂, Jezu Kristə nə, gashu. 14 Tshə kâ tə̂ ye tə kuzu mbrə əzə̂, ndə kə pa tshə djɔ əzə̂ lə əmbrʉ ərə nɔ̂ ə yutu əzə̂ ndə kə pa a sə tə adjera azü nə̂ ye, ə̂në əndje sə də əgo kə mbrə aərə ə̂në ə ga ə ga kɔ.

15 Äwä ə̂në bə lï ndə kə pa əpʉ də nə kə azü, ə gbɔgbɔ lɔsu əndje ə nga kə əndje, də awlra nɔ̂ ə̂në Ndjapä zâ kə əbə kɔ, kə sə̂. Ə̈bə̈ əzü bale wü wü əbə tə əndɨ lə ala ye ne.