Atos 2

Elin̄usa lya Pitolosi

14 Kono Pitolosi sebeli oimana naa akwana likumi ni mumweya ni kwamba ni liywii no kuyupahala onene nji, "Anyi aanu na mu Judeya naanyi monje muyoya mu Jelusalema, mulimuke etaba eyi, mi muteetete wino ku maywi ange.

15 Aa aanu kasikoliwa, omo mu hupulela, kakuli ino isili ehola no (9 okoloko), 16 kono esi esi nakwambiwa kwa munuhi wa Nyambe Jowele nji,

17 ‘Cwale enako no mamaneneno aba saiye, kame kwamba Nyambe,

kame sani itele Emebo yange ba munu yonje.

mi aanenu no ashimani naa no akatana kame sa nuhe,

mi andumbana enu mba mono etipono,

mi naa supali enu mbaa loto etitolo.

18 Ee, mi mane naabika ange no alume naa no akati mu maywaa awo,

mba na itele Emebo yange mi kame sa nuhe.

19 Kame sani tende etimakazo mu wilu

neyi saimonahale ba litunga bano banji.

ounyinga, ni mulilo, ni wise

20 eliywaa kame saali futuke okutenda ouwi

okweti afutuke kanyi ounyinga,

abo eliywaa lya Mbumu ekalya siiya kale,

eliywaa linene eli lilimukiwa.

21 Mi cwale ao onje aisana ba litina lya Mbumu kame sayoyisiwe.’

22 "Anyi alume no Esilaele, muyupe amaywi aa! Jesu no Nazaleta omulume muna limukisiwa kwa Nyambe ni emisebezi no kongola, ni timakazo, ni tiponiso eyo ana kutenda Nyambe mwa yonyene mukaci kenu, kanyi omo mulimukele naanyi. 23 Wuyu Jesu ona kubetekiwa mu muhupulo ni mukulimuka kwa Nyambe, na muku mungongotela ni ku mwibaa ni maoko aawo asiku tenda ouyi. 24 Kono Nyambe na ku mwingula kwaafu, okumu lukulula kweeyi no kucilisa no aafu, kakuli ka kwa siku twesahala nji anungiwe ku lufu. 25 Kakuli Dabida abaamba okukumanena ni yonyene nji,

"Kame ni monanga Ombumu balubala wange enako yonje,

kakuli kame ali ku Lyoko lyange no silyo mi kanitamba okunyanganyisiwa.

26 cwale abo omucima wange kame onaku wabelelwa, mi olulimi lwange kame lunaku nyakalala.

mane ni lutu lwange mba luyoyo mu sepo,

27 kakuli kautamba kuleselela Emebo yange mu sibaka no afu,

simba nji oleselele woyo no kukena nji aole.

28 Kame ona nimonisa endila ita ku moyo,

mi okumonahala kowe kame sakuni iyate oku nyakalala."

29 "Abaange, kame ni myambela epatalaza eyi no njekulyetu Dabida nji kame ana kufa ni kupumbekiwa, mi elibita lyaye kwa lisili kwaaci ni balelo lino. 30 Mu kutenda omunuhi wa Nyambe, ni mu kulimuka nji Nyambe kame ana musepisa mukweeta kwaye nji kame sakutunde omunjili ku lusika lwaye ni kwikala ba lubona lwaye. 31 kame ana kumona eyi nakuuso ni kwamba eyi no kwinguka kwa Kilesite nji,

‘Katamba okuleselelwa musibaka no ao no kufa,

simba nji olutu lwaye luole.’

32 Yokame Jesu ona ingulwa kwa Nyambe kwaafu, mi mutaba eyo aaci toonje kame tuli etipaki. 33 Munyima no kukambamisetwa ku Lyoko no silyo lya Nyambe, mi sebeli otambula Emebo No Kukena ana ku sepisiwa kwa Sitaye, cwale na iitelwe kwaaci yo mumona ni ku yupa. 34 Kakuli Dabida kasiku kambamena ku wilu, kono yo kame onamba nji,

‘OMBUMU naamba kwa Mbumu wange,

Oikale ku Lyoko lyange no silyo

35 konji aba sani tende eila yowe esipula no malyatelo no makondo owe.’

36 "Cwale mulesele onje asi ndoo no Isilaele alimuke eniti nji Nyambe na mutende oumbumu ni Kilesite wuyu Jesu woyo munaku ngongotela!"

37 Mi cwale aba ana kuyupa eyi, kaa sikukuyupa wino ku micima mi sebeli aamba kwa Pitolosi ni kwa atumiwa onje nji, "Abeetu, ngasibine sa tu tende?"

38 Cwale Pitolosi sebeli wamba kwa onyene nji, "Mubake mi mu kolobeziwe moonje mu litina lya Jesu Kilesite nji mu lemenwe ku ibi yenu, mi mba mu tambula empo no Mebo No Kukena. 39 Kakuli esepiso kame ili kwaanyi ni kwaa nenu ni kwao ali oku no kuleba, awo onje sa isaniwe kwa Mbumu Nyambe wetu.

40 Pitolosi kame ana kwa kutaza ni maywii amanjili no kupula ana kwa kumbela, yo amba nji, "Mu ku babalele ku lusika olo no kwiiba!" 41 Cwale awo ana ku tambula amaywii aye sebeli akolobeziwa, mi kame sebeli kwekeziwa aanu no kukwana eikiti yaatu (3;000) ba liywaa elyo.