João 21

Jesu yo Kumonahaza kwa Iyetwa aye Atanu nayiili (7)

1 Munyima no eyi, Jesu sebeli oku monahaza kame kwa iyetwa aye, kunyonga no lisa no Tibeliya mi sebeli oku monahaza mu mukwa ou. 2 Simoni Pitolosi, Tomasi woyo ona kwisaniwa nji Mbile, Natanaele na mu Kana no Galileya, naana a Zebediya, na njili ayiili no aiyetwa aye kame ano kuwana. 3 Simoni Pitolosi sebeli wamba kwa onyene nji, "Kame nita mu kuyamba."

Seli aamba kwa yonyene nji, "Naaci kame tuta niwene." Seli ata mane nukaku longa mu wato, kono ousiku owo kasi kuuya esinjili. 4 Aba kuna kupatalala, Jesu sebeli oimana ba likamba, kono aiyetwa kasi kulimuka nji neli Jesu. 5 Jesu sebeli waaibanguta nji, "Anukana, kamu kwite ondi simba mumweya?"

Seli amu tambula nji, "Ka kwisa."

6 Cwale Jesu sebeli waambela nji, "Muyambe akanyandi ku lineku no silyo no wato, mi mba muwana esinjili." Seli ayamba, mi sebeli akwangwa okuyambula akanyandi, mulibaka no tindi okupula.

7 Cwale omwiyetwa woyo ona kusingiwa kwa Jesu, sebeli wamba kwa Pitolosi nji, "Mbumu wuyu!" Cwale Simoni Pitolosi aba ana kuyupa nji Mbumu wuyu, sebeli okufuka esikumango saye kakuli kame ana kutundisa yo sebeza, ni kumatukela mu liwate. 8 Kono aiyetwa anjili sebeli aiya ni wato alemine okuyambula akanyandi akaiyalile etindi. Kakuli kame ana kwikala abeebi kanyonyo ni likamba, neli amatambo no kukwana omwanda mumweya. 9 Cwale aba ana kumana okufuweka owato ba likamba, sebeli amona amakala no mulilo abo ni ndi yoboniwabo ni sinkwa. 10 Jesu sebeli wamba kwa onyene nji, "Mu lite ku tindi eti muna uyu."

11 Simoni Pitolosi sebeli oingena mu wato nikukokela akanyandi ku likamba aka kaneyala etindi no kuneneba eti tina kukwana omwanda mumweya ni makumi atanu ni twaatu (153) cwale simba nji etindi kame tina kupula ngeso, akanyandi kaka sikukauka.