Marcos 8

Jesu abana Kufepa Aanu no Kubitelela Eikiti Inee (4,000)

1 Mu maywaa awo kame aanu no kupula sebeli aungana, mi na kuulwa esi no kulya, cwale Jesu sebeli oisana aiyetwa aye ni kwaambela nji, 2 "Kame nifela amakeke aa aanu no kupula, kakuli kame ana ikala ni mene ba maywaa aatu mi kakwite esi no kulya. 3 Cwale nji nause ayombile ku mindi yoo, kame sa welele ba ndila kakuli anjili kame atunda oku no kuleba."

4 Cwale aiyetwa aye sebeli amwibanguta nji, "Ngasibine omunu omo sa fepele aanu ni sinkwa muno nimu lihalaupa?"

5 Cwale Jesu sebeli waibanguta nji, "Kame mukwite einkwa ikwana bukai?"

Sebeli atambula nji, "Mutanu ni yiili" (7).

6 Cwale Jesu sebeli olaela aanu no kupula nji aikale banji. Cwale sebeli oshimba einkwa mutanu ni yiili (7) nuukutumela ni kwipatola ni kuba aiyetwa aye nji atabele aanu no kupula, mi sebeli atenda ngeeso. 7 Mi kame ana kwikala ni tusi tunyonyo no kucaniba, cwale sebeli otulapelela ni kulaelela nji ni tonyene otu mwaatabele to. 8 Cwale sebeli alya ni kwikuta ni kutola oubulumusi ou ona kusiyalako ni kwiyata amatanda ana kukwana mutanu na yiili (7). 9 Mi aanu kame ana kukwana eikiti inee (4,000).