Mateus 21

Jesu Yo Ingena mu Jelusama Kanyi Ombumu

1 Cwale aba ana kukeela kunyonga no Jelusalema, sebeli aiya ku Betefage, ba lilundu no itondo no olibe, Jesu sebeli otuma aiyetwa aye ayiili, 2 ni kwaambela nji, "Mute mu mundi ou mwa likete, mi mu muwanguwangu mba mu wana embongolo ina fungiwa ni mwana yo, mutu fungulule, mi muni litele to. 3 Nji omunu yonje kame sa miibanguta, mu mwambele nji, ‘Ombumu kame atusaela, mi mu wangu mba mi pumenene okutu lita kwa mene."

4 Etaba eyo na kame ina kutendiwa nji ku tendahale esi sina kwambiwa kwa munuhi wa Nyambe Isaya nji,

5 "Mwambele omulenen̄i no Sione nji,

Omone, Ombumu wowe uno,

Uyu okukokobelize yo ikalile ba mbongolo

akana no kambongolo."

6 Aiyetwa aye sebeli ata, nuu katenda eso ana kwaambela Jesu. 7 Sebeli a lita akambongolo ni mwana ko, sebeli ayala eikumango yoo ba tonyene, mi Jesu sebeli otinabo. 8 Cwale aanu no kupula sebeli ayala eikumango yoo mu ndila, anjili sebeli atema emitayi no itondo ni kwiiyala mu ndila. 9 Cwale aanu no kupula ana kwenda ku lubala, nawo ana kumu kon̄anga, sebeli akuweleza nji, "Hosanna kwa Mwana Dabida! Ku lumbekwe woyo oiya mulitina lya Mbumu! Etumbo ikale ku mawilu naku liwilu!"

10 Cwale Jesu aba ana kwingena mu Jelusalema, omundi onje sebeli wimana amaefe-efe, mi sebeli aibanguta nji, "Anyine wuyu?"

11 Cwale aanu no kupula sebeli amba nji, "Ya Jesu, omunuhi wa Nyambe mi kame atunda mu Nazaleta no Ngalilea."