João 12

Yesu àinjila muimanga ya Yelusalemu kwa kuhangalala

12 Liduva lipapete, likuwa likulu lya vanu vanaidile ku Yelusalemu kusikukuu ya Vayahudi ichêmwa Pasaka*12:12 Maeleso layamba Pasaka, lola Yohana 2:13. vánipilikana kuva, Yesu ávele nndila kwida ya ku Yelusalemu. 13 Bahi nkutwalanga dinavi dya mitende, nkuhwena unanchingamila, akuno uvanonoha lidi uvachidoni,

"Atumbyangwe Nnungu! Ubalikiwe wako uîda kwa lina lya Nang’olo!

Ubalikiwe wako Nfalume wa Isilaeli!"

14 Yesu ánkojije mwana wa punda, nkumwikala, malinga chiilembwije Mmalemba Lanaswe kuva,

15 "Munayope, mwenu mmenedi mma imanga ya ku Yelusalemu!*12:15 Auno nsitali ùlembwijé "Sayuni" na Vayahudi vátúmílá lina anelyo uvamba imanga ya Yelusalemu. Na maeleso layâmba Sayuni, lola Matayo 21:5.

Lola, Nfalume wenu àvenkwida,

ànkwedile mwana wa punda."

16 Anepo patandi vakuhundwa vake nanga pavanamaite mana la mambo anelo, henga Yesu patumbyengwe kwa kuhwa kwake nni pavakumbukidile kuva malove anelo lánilembwa Mmalemba Lanaswe kumwamba nang’e, na njo vanu chivantendedile.

17 Vanu vammalele vánavele pamo na Yesu wakati pananchemile Lasalo kuhaloka munsati na kunfufula kuhaloka kukuhwa, vánishuhudila anelo lanatendile Yesu. 18 Bahi ing’anya ya anelyo, vanu vohe namene vánihwena unanchingamila Yesu, kwa kuva vánipilikana kuva Yesu njo atendîle chimaiho cha lisaibu anelyo. 19 Bahi Mafalisayo pavalawene anelo, nkuhaulanila kuchidoni, "Wala nanga chinu chitumbehulula kutenda. Lola, vanu vammalele vànituleka nkumpapata nang’e."