João 2

Yesu pa Ing’ande ya Nnungu

13 Sikukuu ya Vayahudi ichêmwa Pasaka*2:13 Pasaka yavele Sikukuu ya Chiyahudi kukumbukila uhiku aula Nnungu pavapohije Vaisilaeli kuhaloka muutumwa nchilambo cha Misili, mmahiku àlalá langa Musa. Nnungu ántumile Malaika Nkúwalala uchinga akahukùùmù n’ding’ande dyammalele dya ku Misili, na kila ing’ande inapakwîjwe myadi ya ungandolo munnango, vánipohwa kuhaloka muhukumu ya Nnungu. painavele pepi, Yesu nkuyamboka kuhwena ku Yelusalemu. 14 Painjidile nnuwani lwa Ing’ande ya Nnungu, nkuvakoja vanu vohe uvasumisa ding’ombe, na vanji uvasumisa dingandolo na vanji uvasumisa dimunda. Na vanu vanji vachibadilana dihela navanang’o vávele umwomwo vaikalèngè n’dimeza dyavo. 15 Bahi Yesu nkupota n’didi, nkujuha isimbo nkuvavingangila pawelu vanu vammalele pamo na dingandolo na ang’ombe vao. Anepo nkudibinula dimeza dya akúbadili dihela na dihela dyavo dya nnyoyo nkumwadilikana. 16 Nkuvahaulila avala vachisumisa dimunda kuchidoni, "Usang’anya vitukutuku vyenu apano. Ing’ande ya Atatangu munaijuhe kuva ing’ande ya kusumisija vitukutuku!" 17 Vakuhundwa vake nkulahimukila malove lalembwîje Mmalemba Lanaswe làhaula kuva, "Itamwi iniitamwa ing’ande yako ìmbengutenda nguwalalwe."