Lucas 5

Yesu àvatandola vakuhundwa vatandi

1 Liduva limo, Yesu áimidile nnyenje Litanda lya Galilaya, akuno likuwa lya vanu lin’dingwike uvagumanagumana uchinga vapilikanile lilove lya Nnungu.*5:1 Munsitali auno Luka àlembile "Litanda lya Genesaleti" kwamba Litanda lya Galilaya. 2 Yesu nkudyona dingalava dimbili divèlè nnyenje litanda. Dingalava anedyo dílekwije na akúupa dihomba vachiûsa miswani n’dinjawu dyavo. 3 Yesu nkuinjila muingalava imo ínavele yanga Simoni uvanchema Petulo, nkunnyaulila Simoni aitukuhije mmedi, kulehu kadiki na kunnyangi. Yesu nkuikala, nkuva wahunda likuwa lya vanu akuno aikèlè mwingalava.

4 Pamalidile kuvahunda vanu, nkunnyaulila Simoni kuchidoni, "Ihengeleje ingalava mpaka pachinu pavêle medi lohe, mukataye dinjawu dyenu, muupe dihomba." 5 Simoni nkunnyang’ula Yesu kuchidoni, "Nang’olo, tùnitumbama kuupa chilo chammalele ila nanga patupete chinu. Henga kwa kuva ùhawile wako, bahi nguchingutaye dinjawu." 6 Pavatadile dinjawu, nkuupa dihomba dyohe namene, mpaka dinjawu dyavo kutandilika kukaduka. 7 Bahi nkuvakapila avao vanavele muingalava inji uchinga vaide vakavayangate. Vanang’o nkuidananga, nkuumbajanga dihomba n’dingalava dyammalele dimbili, mpaka dingalava kutandilika kutitimila.

8 Bahi Simoni uvanchema Petulo palawene anelo lahumidile, nkuhunama muyo mwa Yesu nkuchidoni, "Nang’olo, linyemye na nangu! Kwa kuva, nangu nni munu nguvêle na masambi!" 9 Simoni átangwele uchocho ing’anya nang’e na avake vammalele vánikangana namene ing’anya ya kuupa dihomba dyohe. 10 Yakobo na Yohana vana vanga Sebedayo, vanavele vakúupa avake Simoni, na vanang’o vánikangana. Yesu nkunnyaulila Simoni kuchidoni, "Unayope, kwa kuva kutandikila vino wako ùmbekuva uvaupìlà vanu kwanga Nnungu." 11 Anepo nkuutangila dingalava dyavo mpaka kunyenje litanda, nkulekanga kila chinu, nkumpapata Yesu.