Marcos 10

Yesu ànnamya Batolomayo, munu aputêle meho

46 Yesu na vakuhundwa vake nkuhwika kuimanga ya Yeliko. Pavachiuka muimanga aneyo pamo na likuwa likulu lya vanu, munu yumo aputêle meho uvanchema Batolomayo mwana wanga Timayo áikele nnyenje indila wayuwa. 47 Papilikene kuva Yesu wa ku Nasaleti àpita pachinu anepo nkutandilika kunonoha lidi wachidoni, "Yesu n’dukuluwe Nfalume Daudi,*10:47 Vayahudi vánnolela Masiya kuhaloka nnitawa lya Nfalume Daudi, njomana vànchema Yesu kuva n’dukuluwe Daudi. nguvikile chididi!"

48 Vanu vohe nkunkalipila uchinga anyalale, henga nang’e nkuhalija chihi kunonoha lidi wachidoni, "N’dukuluwe Nfalume Daudi, nguvikile chididi!"

49 Yesu nkuimila, nkuhaula kuchidoni, "Ncheme."

Bahi nkunchema ayula munu aputêle meho, nkunnyaulila kuchidoni, "Likamye ntima! Imila, anakuchema." 50 Batolomayo nkuyaha likoti lyake, nkuuluka, nkummwenela Yesu.

51 Yesu nkummuja kuchidoni, "Ùlembela nikutendele chamani?"

Ayula munu aputêle meho nkunnyaulila kuchidoni, "Nkúhunda, ngùlembela ngupate kulola."

52 Yesu nkunyaulila kuchidoni, "Hwena, ing’ulupa yako ìnikulamya."

Upala ayula munu aputêle meho, nkuhulula kulola, nkumpapata Yesu nndila.