Mateus 15

Ing’ulupa yanga mmahe wa ku Kanaani

21 Bahi Yesu nkuuka pachinu anepo, nkuhwena kuchilambo chivêle pepi na dimanga dya ku Tilo na ku Sidoni. 22 Bahi nkuhaloka mmahe yumo Nkanaani achiikala chilambo anecho, nkukuta, akuno wachidoni, "Nang’olo, N’dukuluwe Nfalume Daudi, ngùvikile chididi! Kwa kuva, nanndenga ànannagiha namene mwali wangu." 23 Henga Yesu nanga panayangw’ile chinu. Bahi vakuhundwa vake nkummwenela Yesu nkunnyaulila kuchidoni, "Nnyaulile ahwene, mana anyakonya chihi watupapata hwetu." 24 Yesu nkuvayang’ula kuchidoni, "Nangu ngùtumwije chihi kwa vanu va Isilaeli vavêle muchi angandolo vayahîke."

25 Bahi ayula mmahe nkuida, nkuntindivalila Yesu malundi, nkuchidoni, "Nang’olo, nguyangate." 26 Yesu nkunnyang’ula kuva, "Ikákatapala kutwala chakulya cha vavana nkuvayelela ang’avanga." 27 Ayula mmahe nkuchidoni, "Elo Nang’olo, henga ata ang’avanga vànalya makombo lamatwêke pameza ya nang’olo wavo." 28 Apala Yesu nkunnyaulila ayula nkongwe kuchidoni, "Mama, ing’ulupa yako nni ing’ulu! Bahi utendewe muchi chulembela." Udisaa udila nanndenga nkummuka ayula mwali, nkulama.