26 Bahi pavanavele nkulya, Yesu nkutwala nkate, nkunshukulu Nnungu, nkuumeya, nkuveng’a vakuhundwa vake. Nkuhaula kuchidoni, "Twalanga mulye, auno njo mmili wangu." 27 Anepo, nkutwala chikombe chivêle divayi, nkunshukulu Nnungu, nkuveng’a vakumbile, nkuhaula kuchidoni, "Kumbilanga mmammalele, 28 kwa kuva, aino njo myadi yangu imaîha lilailano lya Nnungu na vanu vake, imwadilîka kwajili ya vanu vohe uchinga vasamehewe masambi lavo.