16 ✝14.16: In 14.26, na 15.26, na 16.7, na Ro 8.15, na 8.26Na aku ndona Aetta digica ma nenmo kabena iro damna Opotac neaŋca, anna ndo nenmo moi gagranandet. Te, ma nenap iarwara eacraŋnandet. 17 ✝14.17: Mt 10.20, na In 16.13, na Ro 8.26, na 1 Ko 2.14, na 1 Io 2.27, na 4.6Na an Opotaca ma kam gidikna Ŋeroŋ. Na gan tiacarpaikna meikramtaɨra mina manmo mba watitndai, na mina mba aŋgɨitndai. Na mina manmo mba lamŋiitndait. Na nen tikca ne manmo lamŋirena, na ma nenap eacrenan, na ma nena iroar inkarmo eacnandet.

18 ✝ 14.18: Mt 28.20, na In 14.3, na 14.28 "Na aku nenmo mombonik ndaekpembca mba tɨkcariitndai, na nenmo mba wattacarica ne wanaiŋa eacitndait. Wanaiŋ. Aku nen ndambuŋa kɨpnandet. 19 ✝14.19: In 16.16, na 1 Ko 15.20Na kɨdrɨk tekemmotemma gan tiacarpaikna meikramtaɨra aukmo mba mac watitndai. Na nen tikca ne aukmo watnandet. Aku iarwarna eteacna watap eacrenan, na ne toco iarwarna eteacna watap eacnandet. 20 ✝14.20: In 10.38, na 14.10, na 17.21-26Na an ra kɨp te, ne lamŋinande, aku ndona Aet ndambuŋa eacnandet, na ne auk ndambuŋa eacrenan, na aku nen ndambuŋa eacrena. 21 ✝14.21: In 14.15, na 14.23, na 15.10, na 16.27, na 1 Io 2.5, na 5.3Na ramootta aukna tɨpemb wandikmo aŋgɨca matau raŋgai te, an ramootta ma aukmo mamatŋi ŋgoin. Na ramootta aukmo matŋi te, aukna Aetta manmo matŋinandet. Na auk toco manmo matŋinandet, na aku manmo ndomo wandacnandet."

22 ✝ 14.22: Up 10.41-42 Na Iesusa aindopri, Iudas Iskariotna i kabena ramoot, Iudasa ma Iesusmo gainda digirina, "Kacoot tida moca u aimo ndo wandacit, na u gan tiacarpaikna meikramtaɨrmo u ndomo mba wandacri?" 23 ✝14.23: Mt 18.20, na In 14.15, na 2 Ko 6.16, na Epe 3.17, na 1 Io 2.24, na KIEK 3.20Karica Iesusa mana kammo gainda rutirina, "Ramootta aukmo matau matŋiraŋ te, ma aukna kambca matau raŋgairaŋnandet. Na aukna Aetta an ramootmo matŋinandet. Na aukapa Raraŋ Aetaniaca man ndambuŋ nakɨpnandet, na manap memetmbaca eacraŋnandet. 24 ✝14.24: In 5.19, na 5.38, na 7.16, na 12.49Na ramootta aukmo matŋi ŋgocor ŋgoinna, ma aukna kammo mba gɨwaci raŋgaiitndai. Na an kambca ne waracrenanna, anna aukna kambca wanaiŋ. Anna Aetna kamb, na ma aukmo mbagɨrica aku kɨprinan.

25 "Na an mɨnna aku nenap eacri, aku nenmo an reikta kamb toprina. 26 ✝14.26: Lk 24.49, na In 14.16, na 15.26, na 16.13, na 1 Io 2.20, na 2.27Na Ŋeroŋ Rat, ma nenmo moi gagrana Opotac gidik. Na aukna i mbuŋa Aetta manmo mbagɨrica ma kɨpnandet. Na ma nenmo reikca muruŋa riptinandet. Te, ma nena iroara mo ŋgepca ne an aku nenmo neaŋrina kambmo muruŋcamiŋa lamŋi rapacnandet.