Ion 20

Makdala auŋna Maria ma Iesusmo watrina

11 ✝ 20.11: Mk 16.5 Ri, Maria ma an mukmo raekmbaia aea eacri. Na ma ae mbuŋa ramtukca ma mukna inikca watta mbukatke. 12 Ma tik ŋgapaoc gogok aoca eacrena mbaiŋna aiŋa morena ŋeroŋ mbuniŋ mawatri. Na an mbaiŋna aiŋa morena ŋeroŋniŋa an Iesusna waɨra eacrina taupca mbiraca eacrena. Ianna mana paŋanna eacrina taup, na ianna mana orniŋa eacrina taupca mbiraca eacrina. 13 Karica maniŋa Mariamo gainda digirina, "Meacmbitac, kaina moca u aerena." Ri, ma maniŋmo gainda rutiatna, "Mina aukna Kacootna waɨrmo aŋgɨca tenna tɨkrinanna, aku mba lamŋireke." 14 ✝20.14: Mt 28.9, na Mk 16.9, na Lk 24.16, na 24.31, na In 21.4Na ma aindopacarica, ma kumbakeca watrinanna, ma Iesusmo mawatri. Na ma mba lamŋiri, anna Iesus.

15 Ainda moca Iesusa manmo gainda digirina, "Meacmbitac kaina moca u aerena? Na u mandaina ŋgorerena?" Na Maria anmo warɨŋna aiŋa morena ramoot ndopca, ma manmo gaindopatna, "Ramoot aniac, u manmo aŋgɨ taŋ te, u aukmo tɨkrina taup ndop te, aku taŋca manmo aŋgɨna."*20.15 Warɨŋna aiŋa morena ramoot An mukca ma warɨŋna inikca eacrena. 16 Ri, Iesusa gaindopatna, "Maria." Na Maria kumbakeca manmo Iburuna kam mbuŋa gaindopatna, "Rabonai." Na an kam, "Rabonai," mana mɨnɨŋa gaind, "Riripti." 17 ✝20.17: Ŋap 22.22, na Mt 28.10, na Ro 8.29, na Epe 1.17, na Ib 2.11-12Karica Iesusa manmo gaindoprina, "U aukmo kai utiŋ teac, aku ndona Aet ndambuŋmo mba gacreke. Na u taŋga aukna laiplacarmo gaindop, aku tamuŋ naganandet. Na aku ndona Aetapa nena Aet ndambuŋa taŋnandet. Na aku ndona Raraŋ Aetaniacapa nena Raraŋ Aetaniac ndambuŋa taŋnandet."

18 Ainda moca Makdala auŋna Maria ma ŋgepca taŋga, mana iŋa raŋgairena ramtaɨrmo gaindopatna, "Aku Kacootmo watrina." Ri, Iesusa manmo neaŋrina kambmo, ma minmo mboprina.